مفيش شك إن يوم 9 يناير 2007 كان يوم فاصل فى تاريخ الهواتف الذكية؛ و السبب كان إعلان Steve Jobs عن أول هاتف "ذكي" بيقدر يعمل مهام كتير كنت بتحتاج الكمبيوتر علشان تعملها، و اللى سَمَّاه iPhone
لكن على أد ما الموبايل نفسه يعتبر نقلة فى تاريخ الموبايلات، على أد ما مؤتمر الإعلان عن الموبايل نفسه كان دليل على عبقرية Steve Jobs و تماسُك أعصابه اللى مش موجودة عند أي حد دلوقتى!
من فترة انتشر فيديو على Youtube لبعض الموظفين اللى كانوا شغالين على الإصدار التجريبي للسوفتوير بتاع الجيل الأول من سلسلة iPhone، بيقولوا فيه إن ساعتها كان السوفتوير اللى المفروض الموبايل هيشتغل بيه كان لسة فى مرحلة التطوير و كان مليان مشاكل، و إن الموبايل اللى كان Steve بيلعب فيه و بيورى الإمكانيات بتاعته للجمهور مكانش موبايل واحد، و إنما كانوا أكتر من واحد، و كل موبايل من دول بيشغل تطبيق واحد بس، و لازم Steve يمشى فى مسار محدد جوة التطبيق دا علشان الموبايل مايهنجش فى إيده و يتفضح!!
من اللحظة اللى وقف فيها Steve على المسرح للحظة اللى انتهى فيها المؤتمر كانوا الموظفين المسئولين عن تطوير النظام واقفين فى الكواليس ورا المسرح على أعصابهم، خايفين إن غلطة واحدة بس من Steve تتسبب فى تهنيج جهاز من الأجهزة اللى كان بيختبرها أو إن متصفح الإنترنت يتقفل أو مشغل الموسيقى يُقَف فى نص الأغنية، و اللى كان هيخلى منظر الشركة زي الزفت، و كان مشروع الآيفون هينتهى من قبل ما يبدأ أساسًا!
لكن تعامل Steve مع الأجهزة كان فى قمة الاحترافية لدرجة إن محدش عرف إنه بيغير الأجهزة دى أساسًا، كمان من إتقانه للمسارات اللى المفروض يمشى فيها جوة التطبيقات دى، و اللى كان المطورين مسميينها "Golden Path"، أي حد بيشوف الفيديو دا مش هيصدق الكلام اللى الموظفين قالوه، حتى الموظفين نفسهم!
لكن الحق يتقال؛ المطورين اللى كانوا فى الكواليس دول مكانوش بيلعبوا برضو؛ كانوا جايبين إزازة Scotch (نوع من الخمور) و كل ما Steve يمسك الموبايل اللى بيشغل الـApp بتاع واحد منهم يقوم الشخص المسئول عن تطوير الـApp دا واخد له Shot علشان مايشوفش مستقبله بيضيع قدام عينيه... ونعم التصرف بصراحة! فضل الموضوع ماشي تمام لغاية ما عمنا Steve حب يعمل حركة صياعة فى آخر استعراضه للأجهزة و قرر يستعرض كل خواص و مميزات الآيفون على جهاز واحد فى نفس الوقت؛ و كان المفروض إنه يشغل مقطع موسيقى و بعدين يوقفه و يفتح تطبيق Apple Maps و يدور على Starbucks و يفتح تفاصيل أحد فروعهم و يكلمه، و هنا المشكلة إن ولا واحد من الموبايلات دى كانوا جربوا يعملوا عليه مكالمة قبل كدة، لدرجة إن Andy Grigon اللى كان مشرف على تطوير الـApps دى كلها بيقول إن كان فاضل له تَكَّة بسيطة و يحصل له أزمة قلبية من الرعب و من الـScotch اللى شربه، خصوصًا إن شاشة الـiPhone اللى كان Steve بيتصل منه اسودت لمدة نص ثانية أول ما عمل المكالمة!
مفيش شك إن Steve Jobs كان من الشخصيات اللى مابتتكررش كتير، و مفيش شك برضو إنه سبب رئيسي فى قيمة شركة Apple اللي بتزيد كل يوم عن التاني (بغض النظر عن موضوع فخامة التفاحة و الكلام الفاضي دا )، لكن السؤال دلوقتى هل Tim Cock هيمشى فى المستقبل على نفس خُطَى Steve و يحقق اللى كان Steve عاوز يوصل له من الشركة دى، ولا هيخربها الموكوس ابن الموكوس بقراراته الغريبة زي ما ناس كتير متوقعة؟!
إرسال تعليق
تذكر قوله تعالى
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ ))
الان يمكنك اضافة اي مقطع فيديو الى التعليقات وايضا اضافة الصور فقط ضع رابط الصور او مقطع الفيديو في التعليقات
آرائكم تسعدنا، لمتابعة التعليق حتى نرد عليك فقط ضع إشارة على إعلامي