التطبيق الرسمى واتس اب يعلن عن مجموعة من المميزات الجديدة لتطبيقة

مع انتشار أغنية Despacito و الكلام عن إن الأغنية دى أنقذت جزيرة "بورتوريكو" اللى اتصورت عليها من الإفلاس، و سماعنا للأغنية دى فى كل حتة حتى فى الميكروباصات أحيانًا، قد تتخيل إن الناس بتبالغ فى الكلام عن مدى انتشارها، لكن الحقيقة مش كدة خالص...

أغنية Despacito ضربت شوية أرقام قياسية لوز اللوز، و على وشك إنها تضرب كمان شوية أرقام على مستوى Youtube بالذات... أنا عارف و الله إنك ممكن تكون شايفه تريند رخم، لكنه ناجح جدًا... على ما يبدو! 

أغنية Despacito اللى غناها Luis Fonsi و Daddy Yankee و اتنشرت على يوتيوب يوم 12 يناير السنة دى هى أكتر فيديو حصل على Likes حاليًا على يوتيوب، و تفوقت على أغنية See You Again بتاعة Wiz Khalifa
و Charlie Puth (اللى كانت خلفية موسيقية لفيلم Furious 7 و أغنية وداع للممثل الأمريكي Paul Walker) يوم 25 يوليو اللى فات، و حاليًا متفوقة على See You Again بأكتر من 600,000 لايك، و بسم الله ما شاء الله فى طريقها لـ17 مليون لايك! 

فيديو الأغنية دى كمان صاحب تاني أكبر عدد مشاهدات على يوتيوب بعد See You Again (اللى لسة مكلمك عنه دلوقتى  ) و الفرق بينهم مش كبير.. حوالي 30 مليون View، لكن كمان Despacito من أكتر الفيديوهات اللى بقت Viral على الإنترنت، و وصلت عدد مشاهدات الفيديو لـ2 مليار مشاهدة بعد 154 يوم بس من إطلاقه، و دى أقصر مدة أخدها فيديو علشان يوصل الرقم دا!

فى الوقت اللى بكلمك فيه فيديو Despacito اتشاف 2.95 مليار مرة، و بيقترب جدًا من عدد مشاهدات See You Again اللى وصل 2.98 مليار مشاهدة دلوقتى، لكن معدل تزايد عدد المشاهدات لـDespacito بيرَجَّح إنه ممكن يعدى See You Again قريب جدًا، و ممكن يكون أول فيديو يعدى حاجز الـ3 مليار مشاهدة و يكون دا رقم قياسي جديد يتحط فى قائمة إنجازات الأغنية!!

من الحاجات الظريفة إن Despacito اتمنع إذاعتها فى أي إذاعة فى ماليزيا؛ لأن الحكومة بتقل إنها أثارت استياء العامة و إن ألحانها "غير إسلامية" و كدة... قبل ما تعترض أو تشتم عاوز أقول لك إننا من فترة منعنا إذاعة أغاني حمزة نمرة فى الإذاعة المصرية

على النقيض من جو المشاهدات و الـLikes و كدة، أكتر فيديو عليه Dislikes على يوتيوب لغاية دلوقتى هو فيديوكليب Baby للمطرب Justin Bieber (أظن واضح السبب!!)، و اللى عمل لغاية دلوقتى أكتر من 8 مليون Dislike متفوقًا على الفيديو التاني فى القائمة "Call of Duty: Infinite Warfare Reveal Trailer" اللى عنده 3 مليون و نص Dislike بس!! 

للعلم، فيديو Baby بتاع جاستن بيبر دا رقم 23 على قائمة أكتر الفيديوهات من حيث عدد المشاهدات برصيد 1.67 مليار مشاهدة، و رقم 12 من حيث عدد الـLikes برصيد 6.98 مليون Like، بس شكلهم مش هيوصلوا 7 مليون فى أي وقت قريب! 

فى رأيك شايف إن الأرقام دى ممكن تعبر أن أي حاجة؟ و هل تتوقع إننا ندخل فى أي قائمة من القوائم دى ولو حتى بأغنية "رَكِّبنى المُرجيحة"؟