باى باس كوماند ببجى موبايل Command Pubg Bypass بدون باند دخول سيرفر الموبايل

كيف يتم التصوير بالبطئ عن طريق الكاميرا ؟

فى فيديوهات كتير بنشوف مقاطع بتتعرض بتصوير بطىء جدا، بل إن قنوات يوتيوب كتير زي The Slow Mo Guys
و Smarter Everyday بتعتمد على تصوير ظواهر و حاجات كتير حوالينا و عرضها ببُطء
 علشان نعرف الحاجة دى بتتعمل إزاي...

تفتكر بقى إيه فكرة التصوير البطىء (أو بمعنى أصح التصوير السريع)؟!!

النوع دا من الفيديوهات بيتصور بكاميرات من نوع معين (أشهر الأنواع دى سلسلة اسمها Phantom كاميرات
 بتعملها شركة اسمها Vision Research)، و دى بتكون عبارة عن كاميرات خارقة بتصور فيديو بعدد Frames
كبير جدا كل ثانية... كبير دا اللى هو بيوصل 100 و 200 ألف! 

لو مكانش عندك خلفية عن إزاي الفيديو بيتصور، فأحب أقول لك إن الفيديو بيكون عبارة عن مجموعة
 صور كتير جدا بيلقطها مستشعر الكاميرا (أيًا كانت الكاميرا دى، سواء كاميرا فيديو أو DSLR أو حتى كاميرا موبايل)
بسرعة كبيرة... حوالي 30 صورة (أو Frame) فى الثانية، و بعد كدة الصور دى بتتعرض بنفس
 السرعة اللى اتصورت بيها؛ و بالتالي بتشوف الفيديو بيتحرك عادي جدا كأنك شايف حاجة بتتحرك قدامك.

فكرة الـSlow motion اللى بتشوفه فى الفيديوهات دى إن المقطع بيتصور بعدد Frames كبير جدًا فى الثانية
 و بيتعرض بمعدل Frames أقل بكتير من اللى اتصور به؛ و بالتالي المفطع بيتعرض فى مدة أطول من اللى اتصور فيها...
تعال أديك مثال 

لو صورنا حدث مدته ثانية واحدة (فرقعنا بالونة مثلًا)، و صورنا الموضوع دا بسرعة 1000 فريم كل ثانية
و جينا عرضنا المقطع دا بسرعة 25 فريم كل ثانية... هنلاقى إن المقطع دا هيتعرض فى مدة 40 ثانية
 (مع إننا صورناه فى ثانية واحدة)؛ و بالتالى هنشوف تفاصيل كتير جدًا ماشوفناهاش
أثناء ما كانت البالونة بتفرقع فى ثانية واحدة!

---

عكس الموضوع دا نوع من الفيديوهات اسمه Timelapse، و دى بتكون عبارة عن فيديوهات
 بتتصور بـFrame Rate قليل نسبيًا و بتتعرض بـFrame Rate عادي (25 أو 30 فريم كل ثانية)؛
 و بالتالي بتظهر أسرع من الطبيعي بكتير، و دى بتشوفها فى الفيديوهات اللى يعملوها لوَردَة بتفَتَّح أو سحاب بيمشى
 أو عربيات بتجرى فى شوارع المدينة بالليل، و مابتحتاجش كاميرا قوية ولا حاجة زي الـSlow Motion،
 إنما ممكن تصورها بأي كاميرا، حتى بموبايلك!

لو عاوز مثال، ممكن أقول لك إن لو عندما بين الفَجر و شروق الشمس ساعة مثلا، و صورنا السماء فى الفترة
 دى بسرعة 1/2 فريم كل ثانية (يعنى Frame واحد كل ثانيتين... ماتضَحَّكش الناس علينا  )، و لو عرضنا
 الفيديو بمعدل 300 فريم فى الثانية هتلاقى المشهد اللى اتصور فى ساعة بحالها بيتعرض فى دقيقة واحدة!!

عموما فى أنواع و تقنيات كتير من التصوير، كلها بتعتمد على أفكار بسيطة، لكن فى النهاية استخدام الإمكانيات
و تحقيق أقصى استفادة منها بيتوقف على المستخدم نفسه
 و قدرته على توظيف الإمكانيات دى فى اللى هو عاوز يعمله!