التطبيق الرسمى واتس اب يعلن عن مجموعة من المميزات الجديدة لتطبيقة

كيف تقوم بالبحث داخل جوجل مثل المحترفين

فى أغلب الأحيان لما بتبحث عن حاجة على محرك بحث Google بتلاقى كام مليون نتيجة بحث،
 و دايمَا بتلاقى الغالبية العظمى من نتائج البحث ملهاش علاقة بالموضوع الى انت بتدور عليه!!

طيب تفتكر ممكن نتغلب إزاي على المشكلة دى و نوصل للى إحنا عاوزينه من غير ما نلِفّ على الكام مليون نتيجة دول؟!

أولا: علامات التنصيص:

 علامات التنصيص من الحاجات المفيدة جدا فى التعامل مع محركات البحث، و بالأخص محرك بحث Google، و دى بتخلى محرك البحث يتعامل مع الكلام اللى بينها على إنه كلمة مفتاحية واحدة، و استخدامها غالبًا بيكون مع العِبارات و الجُمَل اللى بتبحث عنها؛ يعنى مثلًا لو هنبحث عن عبارة [لو لم أكن مصريا لوددت أن أكون مصريا] هنكتب فى مربع البحث ["لو لم أكن مصريا لوددت أن أكون مصريا"] بالأقواس بتاعتها (اللى هى بتعملها من الكيبورد لما تضغط Shift + ط)

ثانيًا: إزاي تبحث عن حاجة مش عارفها:

 لو أخدنا نفس المثال اللى فات [لو لم أكن مصريا لوددت أن أكون مصريا]، و قُلنا إننا عاوزين نبحث عنه،
 لكن مش عارفين بعض الكلمات من الجملة؛ هتبحث عنها إزاي؟

 هتكتب الكلام اللى انت عارفه من الجملة، و مكان كل كلمة من اللى انت مش عارفهم هتحط نجمة (*)،
و تفصل بين النجوم دى بمسافات؛ يعنى هتفتح محرك بحثك الجميل
و تكتب مثلًا: [لو لم أكن * * * أكون مصريا]

ثالثًا: إزاي تستبعد كلمات من نتائج البحث:

لو بحثت على جوجل عن كلمة [Apple] مثلًا، هتلاقى معظم النتائج عن شركة Apple بتاعة الأجهزة الإلكترونية

طيب لو انت عاوز تبحث عن تفاحة من اللى بتتاكل، هتعمل إيه؟

هتبحث بحيث تستبعد كل الحاجات المرتبطة بشركة Apple، و دا عن طريق إنك تحط رمز السالب (-)
جنب الحاجة اللى انت مش عاوزها، و تلزقها فيها من غير مسافات؛ يعنى هتكتب فى مربع البحث الجميل
 بتاعك مثلَا: [Apple -corporate -company -California]

رابعَا: البحث فى موقع:

قد تكون عاوز تبحث عن كلمة "مدونة أردرويد" مثلًا على موقع زي Facebookk، لكن مكسل تفتح Facebook
 و تبحث فيه؛ هتكتب فى Google الكلمة المفتاحية اللى انت عاوز تبحث عتها فى الأول، و بعد كدة مسافة،
و تكتب site: و عنوان الموقع اللى بتبحث فيه

يعنى هيبقى مربع البحث بتاعك بالشكل دا: [ مدونة أردرويد site:facebook.com ]

خامسًا: البحث عن تعريف كلمة:

ممكن و انت بتتمشى فى أي موقع أجنبي تقابل كلمة غريبة، زي مثلًا "Infrastructure" و انت مش عارف معناها
 و معندكش وقت تدور على مواقع ترجمة للكلمة هتروح فاتح Google و كاتب DEFINE:
 و الكلمة اللى انت عاوزهايعنى هتكتب فى مستطيل البحث الجميل بتاعك [DEFINE: Infrastructuree]
 و هتلاقيه جايب لك أول نتيجة فى البحث تعريف للكلمة من القاموس

سادسًا: البحث عن الصور بالصور:

 لو كان عندك صورة على الكمبيوتر بتاعك أو لقيت صورة على النت و حبيت تتأكد من نصدرها أو تتأكد من تاريخها
و كدة ممكن بكل بساطة تروح لخاصية البحث عن الصور على جوجل، و هتلاقى صورة كاميرا فى شريط البحث
لو ضغطت عليها ممكن تختار الصورة من عندك على الكمبيوتر أو تحط اللينك بتاعها و هو بيبحث عن الصورة
 دى و الصور اللى زيها فى الألوان و زوايا التصوير و الكلام دا كله (بينى و بينك دى
 طريقة اكتشاف الصور المفبركة اللى بيعملها أغلب الناس  )

أو لو بتستخدم متصفح Google Chrome بتضغط كليك يمين على الصورة
 و تختار "Search Google for photo"
 و هتوصل لنفس النتيجة 

بس.. دى كانت أهم النصائح اللى أغلبنا مايعرفهاش، و بتسهل عليك البحث فى جوجل
و بتوصلك أسرع للنتائج اللى انت محتاجها بس