التطبيق الرسمى واتس اب يعلن عن مجموعة من المميزات الجديدة لتطبيقة

كيف يعمل تطبيق Google Maps ؟

من كام يوم كدة كنت فى جولة فى القاهرة، و كالعادة زي كل مرة بروح مكان مش عارفه استخدمت Google Maps
 علشان أعرف الطرق اللى أنا ماشي عليها و المسافة الباقية لغاية ما أوصل للمكان اللى أنا رايحه.

لكن من المرات الكتير اللى استخدمت فيها Google Maps لقيت إن التطبيق بيتنبَّأ بالمدة اللى هتاخدها لغاية
ما توصل لوجهتك بشكل دقيق جدًا، و كمان بيوريك الطرق الأسرع و بيقول لك على الأماكن اللى فيها ازدحام مروري
و الزحمة دى هتأخرك أد إيه، و هنا سألت نفسى: هو Google Maps بيعرف أماكن الزحمة و المدة
 اللى هاخدها لغاية ما أعدى الزحمة إزاي؟! 

المهم بالبحث اكتشفت إن Google Maps بتعتمد على حاجتين علشان تحدد أماكن الزحمة و امتدادها
و متوسط المدة اللى هتاخدها علشان تعدى منها:

- سُرعة العربيات اللى بتستخدم خدمات Google Maps و التغير فى سرعاتها لما بتوصل مكان معين

 - شوية إحصائيات تاريخية عن المكان اللى فيه الزحمة و الأوقات اللى بيبقى مزحوم فيها من اليوم،
 و الأيام اللى بيتزحم فيها من كل أسبوع

لذلك لما بتحدد وجهتك التطبيق بيحدد الطرق اللى هتمشى عليها و المسافة بينك و بين المكان اللى انت رايحه
حسب أقصر طريق ممكن تاخده، و لما بتبدأ تتحرك بيحسب متوسط سرعتك، و بناءً عليها بيحسب
 المدة اللى هتاخدها علشان توصل للمكان اللى انت عاوزه.

لو صادف إن الطريق بتاعك فيه منطقة سيئة السمعة من اللى بيبقوا زحمة على طول دول (زي كوبري أكتوبر مثلًا  )
بيبدأ التطبيق يدور فى قاعدة البيانات اللى عنده على متوسط الفترة اللى الناس أخدوها قبل  كدة علشان يعدوا من الزحمة
 و بيحسب كمان متوسط الفترة اللى انت ممكن تاخدها فى المكان دا بناءًا على سُرعتك، و ياحبذا لو حد ماشي
 فى المنطقة دى و مشغل Google Maps علشان يقول لك توقعاته بأكبر قدر ممكن من الدقة

كمان انت أثناء استخدامك لخدمات Google Maps بيبدأ التطبيق يبعت بيانات عن تحركك لقاعدة بيانات Maps
 بيحدد بيها السرعة اللى انت ماشي بيها، و المكان اللى انت فيه و العريات اللى حواليك و بيستخدموا Google Maps
 برضو؛ و بالتالي خدمة Google Maps بتقدم فى أغلب الأحيان معلومات دقيقة جدًا عن الرحلة
و عن حالة المرور فى المكان اللى انت ماشي منه، و بتقدر تحدد لك أقصر طريق يوصلك بكفاءة