التطبيق الرسمى واتس اب يعلن عن مجموعة من المميزات الجديدة لتطبيقة

بسم الله الرحمن الرحيم

العالم كله بيتكلم و بيشجب الهجوم بالأسلحة الكيماوية على اخواتنا السوريين فى خان_شيخون جنوب إدلب

 و معظمهم بيتهم المسئول عن الهجمات الخسيسة دى بإنه استخدم غاز الـ"سارين" فى قتل المدنيين...

- بتقول غاز إيه؟!!...

السارين (Sarin) مركب صيغته الجزيئية C4H10FO2P، و المفروض إن الحالة الفيزيائية للمركب
دا إنه سائل عديم اللون و الطعم و الرائحة بيدوب فى المياه، و درجة غليانه 158 درجة مئوية...

السارين مركب سام بيأثر على الأعصاب بشكل أساسي (Neurotoxic)، و الجرعة القاتلة (Lethal Dose)
من المركب دا هى 0.01 ملليجرام لكل كيلوجرام من كتلة الجسم.. يعنى اللى كتلة جسمه 100 كيلوجرام
 لو أخد 1 ملليجرام (0.001 جرام) من السارين هيموت فى خلال دقيقة لـ10 دقايق... انت متخيل؟!

السارين يعتبر من أسلحة الدمار الشامل، و تم تصنيفه ضمن الجدول الأول للأسلحة الكيماوية سنة 1993،
و تم تجريم إنتاجه و تخزينه فى أبريل 1997..

طريقة عمل السارين مرعبة جدا! 

 السارين بيأثر على عضلات التنفس (الحجاب الحاجز و العضلات بين الضلوع) و بيسبب شلل العضلات دى؛
 و بالتالي اللى بيتناول المادة دى فى صورة غاز (عن طريق الشم) بيفقد القدرة على التنفس تماما، و بيموت فى متوسط
من دقيقة إلى 10 دقائق لو مأخدش الدواء المضاد لتأثيره بسبب نقص الأكسجين و عدم القدرة على التنفس!

مشكلة السارين كمان إنه عديم اللون و الطعم و الرائحة، سواء فى الحالة السائلة أو الحالة الغازية فى حالة لو كان نقي
 و لو مضاف ليه إضافات بتبقى ريحته زي المطاط المحروق، لكن فى الغالب الإضافات دى بتبقى فى أماكن
التخزين علشان يعرفوا إذا حصل تسريب... أما فى الأسلحة الكيماوية فغالبا بيبقى من غير ريحة!

الـAntidote (أو "الترياق") بتاع السارين، أو الحاجة اللى ممكن تعكس تأثيره على الجسم هى الـAtropine (أتروبين)
 و هو مش دواء غالي أو معقد، لكن التحدى الأكبر هو إن اللى بياخد جرعة من السارين مبيعرفش
 إنه شم حاجة فى أغلب الحالات و بالتالي مش هياخد الدواء اللى يضاد تأثيره!

تخيل معايا كدة إنك قاعد فى أمان الله و فجأة تلاقى إنك مش قادر تتنفس، و تموت حتى قبل ما تعرف إيه اللى حصل!

و الأفجع من كدة إنك تفضل على مر 100 دقايق بتشوف حياتك تنتهى و شريط حياتك بيمر قدام عينيك و انت مش قادر تاخد نفسك حتى و النفس اللى كل أملك فى الحياة إنه يدخل رئتيك يكون هو السم اللى بيموتك!

رحم الله شهداء خان شيخون و انتقم من قاتلهم، و حسبنا الله و نعم الوكيل.