التطبيق الرسمى واتس اب يعلن عن مجموعة من المميزات الجديدة لتطبيقة

بسم الله الرحمن الرحيم

عندك ملفات كتير عاوز تحفظها و مش عارف توديها فين ؟!

الهارد بتاعك اتملى و عاوز تركن شوية حاجات مش محتاجها على جنب ؟!

عندك ملف معين و عاوز تحفظه فى مكان بحيث توصله فى أي وقت و فى أي مكان و من أي جهاز ؟!

عاوز تبعت ملف لحد أو ترفع ملف مهم و تحطه على موقع أو فى جروب ؟!

لو كنت واحد من دول يبقى الـCloud Storage هو الحل 

.

بعيدا عن المقدمة اللى بصوت مذيع الشركة البيضاوية للمنتجات العصرية دي 

التخزين السحابي مهم جدا فى حياة ناس كتير مننا، و ناس كتير أول مرة تسمع عنه 

مبدأيًا.. يعنى إيه تخزين سحابي أصلاً ؟!

التخزين السحابي بكل بساطة ممكن نشبهه بإن الملفات و البيانات بتاعتك بتبقى زي المياه اللى فى نهر أو بحيرة،
 و بتتبخر و بتكون فى صورة سحاب.. "السحاب" دا بينقلها من شرق الدنيا لغربها بسهولة تامة علشان يتم
الاستفادة منه بشكل كامل.

ولا انا فهمت.. عادى خليك متفاهم 

نفس الكلام بالنسبة لملفاتك اللى بتحفظها على Cloudd، بتكون الملفات دى محفوظة زي ما هى بالظبط،
و بتكون موجودة فى مكان ممكن توصله بأي جهاز فيه إنترنت أو تسمح لناس تانية بإنها توصل للمحتوى دا،
بل ممكن تسمح لحد إنه يعدل فيه كمان 

طيب إيه مميزات موضوع التخزين السحابي دا ؟!

متستعجلش على رزقك 

قبل ما أقولك على المميزات أقولك الأول على أنواع الـCloudss الموجودة،
 و دى بتنقسم لنوعين حسب الداتا المسموح ليك تخزنها..

النوع الأول : Cloud متعدد الاستخدامات

و دا مسموح ليك انك ترفع أي حاجة فى أي وقت و من أي مكان.. صور بقى أو أغانى أو ملفات نصية أو باوربوينت
 أو أي حاجة عمومًا، و دى كتير جدًا، منها على سبيل المثال لا الحصر (نفسى من زمان أقول الكلمة دى )

حاجات زي: Dropbox و BOX من غير Drop  و One Drive و Google Drivee
 (نقل مسطرة حضرتك ) و Mediafire و Mega و غيرهم كتير جداً برضو!

النوع التاني Cloud محدد لحاجة محددة :

و دا ممكن يسمحلك بنشر حاجة تانية غير اللى هو معمول ليها أو لأ.. هو و مزاج أهله يعنى 

أمثلة الكلام دا :

-مواقع زي SlideShare و SpreadSheets لمشاركة العروض التقديمية (بالبلدي الباوربوينت) 

-مواقع الاستضافة زي GoDaddy، و دا بيسمح لك برفع محتوى الموقع بتاعك على الإنترنت

- مواقع مشاركة الفيديو.. زي YouTube و Vimeo

- مواقع مشاركة الصور.. زي Imgur و Giphy و لو تحب تضيف الـInstagramm مش هقولك لأ برضو 

-مواقع لمشاركة الملفات النصية و المستندات زي Google Docs 

أيوة يعنى انت مبربق دماغى بالكلام دا لية ؟! ("مبربق" دى بتتنطق "مبربأ" بس احنا مش عند ام مشمش هنا  

خلاص يا عم.. هقولك انت بتحتاج الكلام دا فى إية متزوقش بس 

-لو عندك ملفات مهمة و عاوز تحتفظ بيها فى مكان معين علشان لو الكمبيوتر بتاعك جراله حاجة
مثلاً او لو خايف علي موبايلك من السرقة 

-لو عاوز تبعت ملف لواحد صاحبك فى جزر الهونولولو  ساعتها هيكون قدامك حل من اتنين.. إما إنك تجيب
 نسر زاجل و تربط فى رجله هارد عليه الحاجة دى (مفيش حمامة تشيل هارد حضرتك )

- أو إنك ببساطة ترفعها على Cloud و تبعتله اللينك بتاعها 

-لو حضرتك من النوع اللى عنده ذاكرة السمك زيى و محتاج ملف معين لشغلك أو دراستك سهل جدا تحطه على فلاشة،
 لكن الأسهل هو إنك تنساها 

الحل إنك ترفعها على أي Cloudd علشان لو نسيت الحاجة اللى عليها الملفات توصل ليها من موبايلك أو
من أي كمبيوتر فيه نت.. إحم.. أنا بنسى الفلاشة و بنسى أرفع الحاجة برضو! 

-لو عندك حاجات مهمة على الهارد و مفيش مساحة أو ناوى تطلع عليه طلعة تفرمته يبقى الحل إنك تخزن الحاجة
 دى على كلاود 

-لو عاوز ترفع حاجة على موقع بتاعك أو على موقع من مواقع التواصل الاجتماعي يبقى هتلف تلف و ترفعها على كلاود 

-لو انت مثلا رجل أعمال (بقول مثلا.. مثلا يعنى ) و عاوز الموظفين اللى عندك كلهم يوصلوا لملف معين
أو تكون مطلع على ملفات استيراد فوانيس رمضان بنفسك، برضو هيكون الحل إنك تستخدم Cloud

انت استحليتها على فكرة و قاعد من ساعتها تقولى استخدم كلاود.. استخدم كلاود و مقلتليش الكلاود دا بيشتغل ازاى أصلاً 

يا جدع لو صبر القاتل على المقتول كانت طلعت عربية أنابيب دهسته 

العملية دى بتتكون من كذا حاجة.. بتبدأ من الكمبيوتر أو الموبايل بتاع جنابك اللى انت سجلت دخولك منه على الكلاود

هتحدد ملفات معينة و "ترفعها" على الكلاود

رفعها دا معناه إنك هتنسخها و تبعت نسخة علشان تتحفظ على سيرفرات الشركة صاحبة الكلاود.

بس قبل ما الملفات تروح للسيرفر هتعدى على حاجة اسمها Control Nodee (أو عقدة التحكم)،
و دى هتعمل كذا حاجة.. أولهم إنها بتشفر البيانات بتاعتك (Encryption) ،و بعد كدة تبعتها على أسرع سيرفر
 للمكان اللى انت فيه، ممكن الداتا تفضل فى السيرفر دا أو تتنقل لسيرفر تانى، أو تقعد تتنطط بين السيرفرات زي
 الكورة الجلد كدا ، و دا اللى بيسموه Redundancy (هى إسمها كدة و انا واخدها كوبى و بيست)،
 و دا علشان تقدر توصل لملفاتك و بلاويك السودا من أي حتة 

طيب.. أنا مش هحط الداتا دى هناك و اشد عليها السيفون يعنى.. أكيد هعوز ابعتها لحد أو أحملها انا تانى

هنا هيكون التعامل برضو بينك و بين الـControl Nodee اللى بتجيب البيانات المشفرة من على السيرفر
 و بتعمل حاجة اسمها Decryption (أو فك تشفير) للبيانات اللى انت خزنتها متشفرة، و الليلة السودا دى
 علشان محدش يعرف يوصل للبيانات دى ولا يعدل فيها إلا بإذنك انت.. أو بمعرفة الموقع.. 

طيب يا باشا البيانات دى كدة هتبقى بتاعتى ولا بتاعة الشركة صاحبة السيرفرات ؟!

و الله فى الواقعععععع.. الموضوع دا محل خلاف حتى بين خبراء البرمجيات، منهم ناس بتقول إن طالما
 الداتا عندهم تبقى "عمليا" بتاعتهم

و فى ناس بتقول إن البيانات دى طالما انت اللى حطيتها تبقى بتاعتك انت و محدش يقدر يوصلها
غيرك انت أو أي حد بتسمح له إنه يوصل للحاجات دى.. حتى الشركة نفسها ملهاش الحق فى إنها تعرف محتوى
 البيانات اللى انت مخزنها عندهم، و بالتالى ملهاش الحق فى التصرف فيها.. 

لكن اللى بيحصل فى الحقيقة هو إن الشركات صاحبة سيرفرات الكلاود بتبيع لك المساحة (أو بمعنى أصح بتأجرها لك)
لو انت طلبت إنك تاخد سعة تخزين أكبر، و معظم الدخل بيجى للشركات دى من الناس اللى بيستخدموا سيرفراتهم لأغراض تجارية، و اللى بيقرر إنه يتعامل مع خدمة تخزين سحابي بيكون غرضه حاجتين اتنين: Reliability & Security 

أو الفعالية و الحماية، بمعنى إنى أقدر أوصل للمحتوى بتاعى اللى انا مخزنه عندك فى أي وقت
و من أي مكان و محدش يقدر يوصله غيرى

و لأن شركات التخزين السحابي ليها سمعتها *ضحكة خليعة * المفروض انها بتلتزم بالكلام دا، وإلا بيكون من
 حق صاحب الداتا إنه يرفع عليهم قضايا بالملايين و يكسبها  *ضحكة خليعة كمان *

انت شوقتنى أوى لموضوع الكلاود دا.. ماتقولى على كلاود حلو اشتغل عليه ببلاش 

-لو انت عاوز مساحة تخزين محترمة هيبقى قدامك حل من اتنين: Mega أو Mediafire

الاتنين بيدوك مساحة تخزين 50 جيجا مجانا

(ميديا فير هتحتاج انك تنزل أبلكيشن الأندرويد بتاعهم و الـDesktop clientt و شوية لف كتير علشان
توصل للـ50 جيجا غير كدا هتبقي 10 بس )

-أما لو انت عاوز أسهل حاجة فى التعامل معاها فعندك حاجة زي BOX (اللى من غير Drop  ) هيديك 15 جيجا مجانا لكن ليك حدود معينة لنقل البيانات كل أسبوع..

و عندك Google Drive بيديك 155 جيجا برضو مجانا بتستخدمهم لكل خدمات جوجل واستخداماتك الشخصية

-دروب بوكس على الرغم من إنه أسهلهم إلا إنه حاليا زبالة الزبالة لأنه بيديك 2 جيجا بس مجانا، و الباقى شخلل علشان
تعدى أما One Drive بتاع ميكروسوفت ،فبعد ما كانت ناس بتعتمد عليه كليا لأنه بيدى 155 جيجا مجانا
 و سهل التعامل معاه من الأوفيس.. رجعوا قللوا المساحة المجانية لـ5 جيجا بس، و انت عارف طبعا.
 نفس سياسة شخلل علشان تعدى