التطبيق الرسمى واتس اب يعلن عن مجموعة من المميزات الجديدة لتطبيقة

السلام عليكم و رحمه الله و بركاته 

اخواتى و احبائى فى الله متابعين مدونة أردرويد

أول محاولات التصوير ظهرت فى القَرن الـ11 الميلادي على يد "الحَسَن بن الهيثم" اللى اكتشف إنك لو جبت صندوق
 و خَرَمته و حطيت حاجة قداه ممكن تكَوِّن صورة مقلوبة بنفس الألوان و التفاصيل على جدار الصندوق المقابل للخُرم دا
 و سماها "الخزانة المُظلِمَة ذات الثُّقب"، و اللى اتسَمَّت بعد كدة (Camera Obscura)

لكن تفتكر مين اللى سَمَّاها الإسم دا أصلا؟

سنة 1490، بدأ الفنان الإيطالي "Leonardo Davincii" يعتمد على اكتشاف "الحَسَن بن الهيثم"
فى رسم بعض الحاجات الدقيقة عن طريق تكبيرها على اللوحة اللى بيرسم عليها بتقريبها و إبعادها عن الثقب
 و إضافة عدسات للثقب دا؛ و بالتالي كان بيعرف يرسم التفاصيل اللى فى الحاجة دى...

فى بدايات القَرن الـ18، بدأ استخدام الاختراع بتاع "الحَسَن بن الهيثم" ينتشر فى إيطاليا بين الرسامين
 لما عرفوا إن "ليوناردو دافينشى" كان بيرسم بيها، و سَمُّوها "الحُجرَة المُظلِمَة"...
 بالإيطالي "Camera Obscura"

و بعد كدة اختصارا للكلام بقت "Camera"

سنة 1717، واحد عالِم ألماني اسمه "Johann Heinrich Schulze" كان معاه إزازة فيها مركب
 "نترات الفضة" و مسحوق طباشير، حطه فى الشمس ورا الشباك و راح يعمل حاجة؛
و لما رجع لقى إن المركب اللى فى الإزازة اتحول للون الأسود!

 لكن مش دى المشكلة، ما هو راجل بتاع فيزيا و عارف إن نترات الفضة بتسوَدّ فى الشمس، لكن اللى لفت انتباهه
 فعلا هو إن الإزازة كان فيها خط أبيض مَسوَدِّش، و اللى اكتشف إنه فرع شجرة قدام الشباك منع وصول
 الضوء للإزازة... من هنا جت له فكرة أفلام الكاميرا!

سنة 1777، الكيميائي "Carl Wilhelm Scheele" قرر إنه يستخدم مادة "كلوريد الفضة"
 فى صناعة الأفلام لأنها حساسة أكتر للضوء، لكن المشكلة كانت إن نترات الفضة بيتغير لونها مؤقتا
 و بترجع لطبيعتها بعد فترة قصيرة...

لكن أول محاولة ناجحة لالتقاط صورة دائمة كانت سنة 1825، من تصوير
واحد اسمه "Joseph Nicéphore Niépce"... و الله ما أنا عارف بيجيبوا الأسماء دى منين

 المهم إن الراجل دا استخدم "الخزانة ذات الثقب" بتاعة الحَسَن بن الهيثم، لكن حط فى الجدار المقابل للخُرم
 ورقة متغطية بمادة الـ"بوتامين" اللى بيستخدموها كعازل للرطوبة دلوقتى و اعتمد فى الحكاية دى

 على  إن البوتامين دا بيتَصَلَّب لما بيتعرض للضوء لفترة كافية، و بعد كدة كان بيمسح
الورقة بالزيت علشان يشيل البوتامين اللى لسة سائل!

أول صورة تحتوى على أشخاص كانت سنة 1838، و كان اسمها "Boulevard du Temple"،
و صورها المصور الفرنسي "Louis Daguerre"، و تطلبت إن الشخصين اللى فى الصورة يفضلوا
 متسمرين مكانهم لمدة 7 دقايق كاملين (مدة تعريض الفيلم للضوء)

أول سيلفى بقى كان سنة 1839، و كان من تصوير المصور "Robert Cornelius" لنفسه...
بس مكانش عامل بوز البطة ولا حاجة

و فضلت الكاميرات تتطور لغاية ما ظهر أول موبايل بكاميرا فى التاريخ... اتصنع سنة 2000،
و كان موبايل Sharp J-SH04... بكاميرا 0.11 ميجابيكسل... بحالهم

النهاردة الكاميرات بقت حاجة مهمة جدا فى حياة ناس كتير، قول لنا بقى، هل الكاميرات

بالنسبة لك حاجة ذات أهمية ولا حاجة زي عدمها؟