التطبيق الرسمى واتس اب يعلن عن مجموعة من المميزات الجديدة لتطبيقة

ما هو فيروس الشورت كت (Shortcut) و كيف تحمى نفسك منه

بسم الله الرحمن الرحيم

من أسبوعين حطيت فلاشتي في كمبيوتر واحد صاحبي.. وياريتني ما حطيتها..

 الفلاشة دخلت الكمبيوتر عادي زي أي فلاشة بنت ناس بتحترم نفسها، خرجت وقد تَم أغتصابها .. الملفات اللي جواها
كان ناقص أسمعها وهيا بتعيط من اللي حصل فيها 

الفلاشة وبكل بساطة جالها ڤيروس وعٙلِم عليها.. ڤيروس حقير أسمه Shortcut.. مسابش ملف في حاله..
 قٙلٙب عالي الفلاشاية واطيها.

إيه الـShortcut ده وبيعمل إيه؟ 

أنزل ع الفقرة الجاية وهعرفك عليه وأخلي فيه بينكم Friendship -صداقة- كبيرة كمان 

- إيه ڤيروس الـShortcut ده؟ 

هوا الـShortcut دا يا سيدي ملوش أي تعريف ثابت علي ويكيبيديا، لكن عامةً فـ هوا  ڤيروس
 رخم بيتنقل من أي جهاز للتاني بكل سهولة، وأغلب برامج الأنتي فيروس مبيتعرفوش عليه.. 

الفيروس دا عبارة عن ملف cmd، الفيروس الحلو دا بياخد الملفات بتاعة حضرتك الموجودة علي الـDriver من دول
أو الفلاشة ويخفيها، ويديك بدلها أختصارات كل أختصار بأسم ملف من الملفات يعني لو عندك 10 ملفات
 هتلاقي 10 أختصارات بأسمهم ليها إمتداد (.lnk)..

الملفات اللي بيتم إخفاءها دي بتكون موجودة علي الجهاز بس تقدر تقول كده بتبقي (مستخبية) عن نظر حضرتك
علشان متقدرش توصل لها.. Guess why؟ لأن هيا دي وظيفة الفيروس.. فيروس موجود
 علشان يخفي ملفاتك ويعكنن عليك. 

 الفيروس دا مُسالم.. هوا مبيأذيش ملفاتك بالمعني الحرفي للكلمة.. بيخفيها.. لكن بعد فترة ممكن يأثر عليها أو يخليها
معطوبة corrupt وغير صالحة للفتح. وممكن بعد فترة يمسحها ويريحك ويريح نفسه من الملفات دي 

- الفيروس الجميل دا بيجيلك منين؟

الفيروس دا يا سيدي ممكن يجيلك من كذا مكان زي:

- حملت ملف (.exe) من مصدر غير موثوق بيه..

- وصلت لجهازك فلاشة USB أو أي جهاز متصاب بالفيروس دا، فـ أنتقل علي جهازك..

- وصلت فلاشة الـUSB بتاعتك بجهاز كان مُصاب بالفيروس دا، فـ أنتقل عندك وملي الدنيا..
زي ما حصل معايا كدا 

- أنواع الفيروس الجميل دا..

الفيروس (الجميل برضو) دا ليه 33 نوع هستعرضهم معاك سريعاً قبل ما أقول لك إزاي تتخلص منه،  وهما:

1- الـDriver Shortcut Virus:

 ودا باين من أسمه.. نوع من الفيروس بيستهدف أي قرص قابل للإزالة، زي الفلاشات، الهارد الخارجي الـExternal
 اللي بيشتغل بوصلة USB دا، وممكن يستهدف موبايل حضرتك برضو الفيروس دا بيعمل Shortcut من كلللل ملفاتك.. كلها.. 

.

الفيروس دا تقدر تقول عليه نوع من الـTrojann البَحت بمجرد ما ينتقل لجهاز بيتخطي كل الملفات،
ويقوم لاممها كلها في مكان واحد، ويعمل منهم Shortcut. 

بعد ما البرنس دا بيخلص شغله، بتدخل أنتا ع الفلاشة -مثلاً- علشان تتصفح ملفاتها،
 فتدوس كلكين (Double Click يعني ) علي الملف علشان تفتحه، وفي نفس الوقت أنتا بكده بتنشط الفيروس
دا وبيعمل المهمة  اللي متحددة ليه (ودي بتبقي متوقفة علي طريقة تكويده، يعني اللي عمل الفيروس عامله
علشان يعمل إيه بالظبط) زي أنه يتجسس علي المتصفح بتاعك، يسرق كلمات السِر، أو أي حاجة تانية.

-

2 - الـFolder Shortcut Virus:

الفيروس الجميل دا مش محتاج لشرح تقريباً.. فيروس بينشئ Shortcut متداخلة كتير أوي من الملفات
 الموجودة عندك وفي بعض الأحيان بيتلف الملفات الرئيسية نفسها الموجودة. 

 الفيروس دا مش قوي زي اللي قبله، حيث أنه ممكن بس يتجسس علي أنشطتك اللي بتعملها ع الجهاز بس،
أو حتي يرفع أي بيانات من الملف المتواجد فيه، لكنه مازال شايف شغله كويس وبينتقل بين الأجهزة وحَيٌ يُرزَق للآن  

3- الـFile Shortcut Virus:

فيروس أختصارات الملفات.. الفيروس دا خطره مبيبقاش كبير غير لمّا يهاجم ملف الـ(exe) بتاع أي برنامج
 ودا لأنه ممكن يتجول جوا البرنامج براحتُه داخل نطاق البرنامج ويعمل ما بدا لُه كمان.
وعيبه أنه بيتكاثر كتير أوي بمجرد ما بينشط أول مرة.

* كل نوع من الـ3 دول له طريقة عمل غير التانية، ودي كانت لمحة بسيطة عنهم عامةً

-إزاي بقي تتخلص منهم كلهم؟ 

ممكن تزيلهم بطريقتين: بالـCommad Line أو الـCMD.. أو ببرنامج USBFix
 (ودي اللي بفضلها) وهذكر لك الأتنين دلوقتي..

- طريقة الـCMD:

*أتأكد الأول من إظهار الملفات المخفية علي الكميبوتر بتاعك*

وبعدين من قائمة Start أفتح -أو أبحث عن- Run، ودوس عليها كليك يمين وأختار Run as administrator
 علشان تضمن إن الكود اللي هتكتبه هيتطبق. 

بعدين خد الكود اللي بين القوسين دا: (attrib h:*.* /d /s -h -r -s) نسخ/Copy وفي الـCMD
 أعمل له لصق/Paste.. مع مراعاة تغيير الـ(h) دي لأسم الفلاشة المتصابة اللي عندك.. يعني لو اللي
عندك كانت f خليها في الكود f.. وهكذا..

وبعد ما تنسخ الكود أضغط إنتر Enter علشان الكود يتطبق. 

بعد ما يتطبق هتروح للفلاشة المصابة وتمسح أي ملف قدامك تلاقيه بأمتداد (lnk) أو (fbs) أو (inf). 

وهتلاقي الملفات ظهرت لك والدنيا بقت تمام.. 

- الطريقة التانية بالـUsbFix:

البرنامج دا حلو وسهل وبسيط جداً.. 

بعد ما تحمل البرنامج من الرابط اخر الموضوع أفتحه ودوس علي research اللي عليها أيقونة عدسة، وبعد ما يخلص الفحص دوس
 علي زرار  clean اللي هتلاقيه قدامك. 

وبكدا تكون نضفت كل الجهاز من الـShortcut.. بس متنساش تعمل إعادة تشغيل للكمبيوتر
 وبعدها هتلاقي كل الملفات رجعت تاني. 

* البرنامج بيعمل إصلاح لكل بارتيشنات الجهاز، وأي فلاشة أو جهاز متوصل بالـUSB كمان..

-

بس يا سيدي.. هوا دا الـShortcut

رابط تحميل البرنامج من الموقع الرسمى

من هنا