باى باس كوماند ببجى موبايل Command Pubg Bypass بدون باند دخول سيرفر الموبايل

نصايح عامة ليك قبل ما تفكر تشترى طابعه 

بسم الله الرحمن الرحيم

الدراسة جت و المكتبات بتطبع الورقة الأسود برُبع جنيه و الألوان باتنين جنيه و نص 

الواد شيكا_راجع_المدرسة و فلوسه ضايعة على طباعة ورق الحصص و المحاضرات، و بعد ما تكلفة طباعة الورقة اتضاعفت مرتين و نص.. تعمل إيه يا تش؟ تعمل إيه يا تش؟ قالك أشترى برنتر 

بس قبل ما يشترى برنتر حب يسأل و يستفيد من خبرة ناس منقوعة فى الطباعة و بتشد حبر منذ نعومة أظفارها 

بؤس على حق ربنا يعنى

المهم.. قلنا نكتب الكلمتين دول
 نفيد بيهم تش و غيره من الناس اللى بتفكر تشترى برنتر 

--

أولا: عاوزك تعرف إن فى نوعين رئيسيين من الطابعات :

- طابعات الليزر (الحبر الجاف)

 - طابعات الحبر السائل (الخرطوشة)

و طبعا كل نوع فيهم له مميزاته و عيوبه، و أنا هنا علشان أقولك الكلمتين اللى فى بطنى و ماشى على طول 

--

أولا: طابعات الحبر السائل:

. - النوع دا من الطابعات ظهر قبل النوع التانى بفترة، لكنه لسة بيُستخدم لغاية النهاردة بالإضافة لطابعات الليزر

. - فكرة عمل الطابعة دى هى إن فيها حبّارات و راكبة على أسياخ معدن، و بتتحرك على الورقة يمين و شمال أثناء ما البَكَر اللى فى البرنتر بيلِف الورقة لقدام

. - لو مطلوب إن المكان دا يكون فيه حبر، بتقوم الحبارة تنزل نقط صغيرة جدا من الحبر فى المكان المطلوب،
و لو مفيش مبتنزلش.. بالمنطق يعنى 

لغاية ما تتطبع الورقة اللى انت عاوزها

مميزات النوع دا:

. - طابعات الحبر السائل رخيصة بشكل غبي 

(ممكن الطابعة توصل لأقل من 200 جنيه)

. - بتقدملك مميزات إضافية زي الـScanner مثلا.. على الرغم من السعر الرخيص

. - طابعات الألوان من النوع دا متوفرة جدا و منتشرة جدا و رخيصة جدا

. - سهل إنك تصلحها بنفسك، و هقولك ليه فى العيوب 

. - على الرغم من كل المميزات دى، إلا إن حجمها صغير جدا لو قارنتها بطابعات الليزر
اللى بتديك نفس الإمكانيات 

نيجى بقى للعيوب:

. - الطباعة من النوع دا بطيييييييييييييييييييييييييييييييييييييييييييئة جدا مقارنة بطابعات الليزر

. - الحِدَّة اللى بتقدمها فى الطباعة أقل بكتير من الموجودة فى طابعات الليزر؛ و دا بسبب تكنولوجيا الطباعة اللى بتعتمد على حبَّارة بتنَقَّط 

الورقة لازم تفضل فى الهوا لمدة معينة (بتختلف على حسب نوع الطابعة) لغاية ما الحبر السائل ينشف،
و يا ويلك يا سواد ليلك لو حطيت إيده عليها و هى لسة طرية 

. - دقة الطباعة أقل بكتير من دقة طابعات الليزر،
 و دا علشان الوقت اللى بتاخده فى الطباعة يكون مناسب و متقعدش جنب الورقة للصبح

 العيب الأكبر فيها (دا و اللى بعده ) إن على الرغم من سعر الطابعة نفسها الرخيص جدا،

بتلاقى الحَبَّارات دى غالية جدا بالنسبة لعدد الورق اللى بتطبعه 

(عاوز أقولك إن تمن الأربع خراطيش فى أغلب الأحيان بيعدى تمن البرنتر نفسها )

. - لو انت فكيك و جبت حبارات تعينها عندك علشان لو الحبارة نشفت، أحب أقولك مبروك على الخاوزق 

الحبر بتاع الطابعات دى بينشف بسرعة جدا مع الرَكنة (حتى لو ركنتها لمدة أسابيع بسيطة)، و دا بيقرفك جدا فى إن الثقزب اللى بتنزل نقط الحبر اللى قلتلك عليها دى بتتكتم، و بتضطر تغير الحبارات و تشترى طقم جديد 

. - على الرغم من بساطة فكرة عمل الحبارات دى، إلا إنها بنت كلب فى موضوع الحبارات دا بالذات؛ لأن الحبارة بتكون مصممة علشان تطبع عدد معين من الورق، و بعد كدة تقولك "بَحّ"، و "مفيش معنديش" 

-

الأسباب دى كلها، و على الرغم من مميزاتها خلتها تنحصر قدام طابعات الليزر، و بالذات لو هتستخدمها فى المجالات التجارية

----------

النوع التانى: طابعات الليزر أو الحِبر الجاف:

. - النوع دا يعتبر أحدث من النوع اللى فات، و بيديك مميزات كتير كويسة

. - فكرة العمل هو إن الـCartridge (أو الخزان بتاع الحبر) بيكون فيه جزء مغناطيسي متوصل بمجال كهربي، و بمجرد
 ما يتشحن بيجذب حبيبات الحبر (اللى بتكون عبارة عن كربون مُجَزَّأ) و بمجرد مرمر الورقة على الحبر دا يروح لازق فيها

. - طبعا الحبر دا بيكون عبارة عن هِباب اسود (مش شتيمة و الله هو فعلا هباب ) و بالتالى بيكون مش ثابت على الورق؛
 لذلك الورق بيعدى على فُرن بيسَخَّن الحبر دا و يلزقه فى الورقة؛ و بالتالى يبقى الحبر و الورقة حاجة واحدة
 و الحبر ميطلعش من الورقة 

-

مميزات النوع دا:

. - سريع جدا فى الطباعة لو هتقارنه بطابعات الحبر السائل

. - الحبر بتاعها رخيص نسبيا بالمقارنة بالحبارات السائلة

. - متوفرة بجميع الأشكال و الأحجام و المميزات، و انت تختار اللى انت عاوزه بقى 

. - حِدّة و تباين و دقة الطباعة تضرب طابعات الحبر السائل بالجزمة 

. - الورق بيطلع من الطابعة ناشف؛ و بالتالى مش هتحتاج إنك تسيبه ينشف و الكلام دا

. - بتكون فيها مميزات كتير مش موجودة فى طابعات الحبر السائل، زي طباعة الورق وش و ضهر مثلا

. - الحبر بيكفى طباعة عدد كبير جدا من الورق؛ و دا لأن الورقة فى الغالب مبتاخدش حبر كتير

. - ممكن تملى الكارتدج بأي نوع حبر من أي مكان، و دا على عكس طابعات الحبر السائل اللى أحيانا الحبارات بتاعة موديل معين مبتشتغلش على موديل تانى حتى لو من تصنيع نفس الشركة 

. - موجود منها طابعات أسود بس، أو أسود و ألوان

. - الحبر مبينشفش مع عدم الاستخدام (لأنه بيكون ناشف أصلا 

) و دا بيديك إمكانية إنك تركن الطابعة بتاعتك على الرف لمدة طويلة من غير ما تخاف على الحبر ولا على الكارتدج

. - بعض الطابعات (زي مكن الطباعة الكبير) بيديك إمكانية إنك تغير الحبر بنفسك.. مجرد إنك بتشترى كيس
و تحطه فى حاجة زي إزازة كدة و شكرا

----

العيوب:

. - على الرغم من إن الحبر رخيص، إلا إن الطابعات دى تعتبر أغلى من طابعات الحبر السائل بكتير،
و السعر بيزيد كل ما المميزات اللى فى الطابعة زادت

. - طابعات الألوان الليزر مكلفة جدا، سواء فى سعر الطابعة نفسه أو فى أسعار الحبر

. - طابعات كتير دلوقتى بقت بتشتغل بنفس موضوع عدّاد الورق و الكلام دا، لكن التجار المصرين الله يصلح حالهم بقوا بيستوردوا التشيبات دى من الصين

. - مينفعش تحط حبر جديد على الحبر القديم اللى فيها؛ لأنك لو اتناصحت و عملت كدة هيلَزَّق فى بعضه و يبوظ الـPolarizer و الـMagnetic Mechanism و هتضطر تشترى كارتدج كامل بتمن البرنتر الجديد تقريبا

. - عن تجربة.. أي طابعة مهما كانت بتحتاج صيانة دورية لأن أوقات كتير حاجات بتضرب فيها،
و لو حصل فيها أي حاجة بيبان على الورق المطبوع فورا

-----

ممكن تتغلب على موضوع السعر الغالى لطابعات الليزر دا بإنك تشترى طابعة استيراد، و بالتالى بتضمن كذا حاجة:

. - إنك تجيب طابعة بسعر كويس (لأنها بتكون مستعملة)

. - إنك تجيب طابعة من نوع أو ماركة معروفة؛ و بالتالى بيكون موضوع الصيانة و قطع الغيار و الكلام دا سهل بعد كدة

. - إن الطابعات دى بتكون مستعملة استعمال نضيف -غالبا-

. - معظم الطابعات دى بتكون جاية م شركات؛ لذلك بتكون مخصصة للأشغال الشاقة زي ما بيقولوا

 ؛
لذلك (عن تجربة برضو) الطابعات دى بتعيش أكتر من الطابعات الجديدة اللى بنفس السعر

---

مش هقدر أرشحلك أنواع طابعات معينة لأن الأفضل بالنسبة ليك هو اللى تلاقيه منتشر و تلاقى له قطع غيار جنبك

 حاول تبعد عن الحاجات اللى فيها تشيب للحبر لأن تمن التشيب بيكون زيادة على تمن الحبر فى كل مرة بتملى البرنتر

--------

لو بتدور على الحل الأمثل.. ممكن تشترى انت و مجموعة من أصحابك طابعة ألوان ليزر، و يا سلام بقى لو جبتوها AIO
(أو All In One)، و دى كمان بيكون فيها Scanner و ممكن تستخدمها كماكينة تصوير و كلام من دا، و الورق إما إنكوا تتشاركوا فى تمنه أو كل مرة واحد يجيب رزمة 

أو لو انت مش اجتماعي و انت و أصحابك ساكنين بعيد عن بعض، ممكن تشترى طابعة ليزر صغيرة للورق الكتير و الشغل التقيل، و طابعة حبر سائل للصور الألوان و الحاجات الخفيفة الطيّاري دى

احلى مسا عليكو <3