التطبيق الرسمى واتس اب يعلن عن مجموعة من المميزات الجديدة لتطبيقة

معلومات مفيدة ليك قبل ما تشترى كارت ميمورى

بسم الله الرحمن الرحيم

نبدأ شرح انهاردا بقى حاجة مفيدة ليك :D :D

معظمنا لما بنروح نشترى ذاكرة خارجية (Memory card) بيروح على إنه هيجيب ميمورى "كذا جيجا"،
و أحيانا لو لقى كذا ميمورى بنفس السعة يجيب أرخصهم، و أهو كله ميمورى 

أو بيكون كل همه إنه يشترى أكبر سعة بأقل سعر، و بيهمل حاجتين مهمين جدا مكتوبين على علبة الميمورى
 جنب السعة بخط صغير لا يُرَى بالعين المجردة 

فى الغالب هتلاقى كلمة Class 4 أو Class 10 (واحدة بس منهم)

و هتلاقى كمان مكتوب جنب الـClass كلمة SD أو SD HC أو SD XC

لوانت من ذوى النظر الحاد و قوة الملاحظة النارية، و لفت نظرك الرقم اللى فى دايرة مش كاملة ، و اللى بيمثل الـClass
بتاع الميمورى؛ وسألت البياع عن معنى الرقم دا.. بيكون الرد حاجة من الاتنين..

إما إن البياع يكون ابن سوق ( بيصَرَف نفسه و بيمشى حاله يعنى ) هيقولك إن دا رقم الماكينة اللى عملت الميمورى
أو رقم المصنع اللى اتجمعت فيه (و دى حصلت قدامى فعلا)

أو إن البياع يكون ابن حلال و بلاش التانية، و يقنعك إن الميموري الـClass 4 أفضل من Class 10 و دا على أساس ان واحدة Class 4.0 و واحدة Class 1.0، بل إن أحيانا بتبقى الميمورى الـClass 4 بنفس سعر Class 10 أو أحيانا أغلى، و كمالة الصياعة.. أحيانا بنلاقى بعض الشركات اللى بتصنع الميمورى بتكتب عليه فعلا Class 4.0 

أو ممكن متلاقيش مكتوب عليها Class أصلا.. زي الميمورى الـSanDisk اللى الحاج
مرضاش ياخدنى و هو بيشتريها و راح لبسها من شهر و نص يلا.. ربك بيخلَّص 

--

تشترى الميمورى الـClass 4 و انت مقتنع انها أحسن من الـClass 10، و بعدها تكتشف إن الموبايل بيهنج و هو بيصور فيديو بدقة كبيرة، أو الـGallery بيهنج و هو بيفتح و تتحول حياتك مع الموبايل إلى جحيم و تهنيج فى كل ما يتعلق بقراءة و كتابة البيانات:(زي ما حصل مع الحاج بالظبط و خدنى اشترينا ميمورى تانى زي الباشا) 

أو ممكن تكون مبذر و تروح تدفع دم قلبك فى ميمورى 64 جيجا Class 10، و تحطه فى موبايل سامسونج
جالاكسى بوكيت و تكتشف انه مبيشتغلش 

و لأن الميمورى أغلى من الموبايل بتحتار ترمى إيه فيهم 

-----

علشان ماتتحطش فى موقف من المواقف دى شوف الكلمتين دول.. أو خدنى معاك و انت بتشترى الميمورى و هاتلى آيس كريم 

أولا: يعنى إيه الـ"Class" بتاع الميموري؟

يعنى "فَصل".. معروفة

الشركات المصنعة لأي حاجة لتخزين البيانات (سواء ميموري أو هارد أو حتى فلاشة) بتعمل حد أدنى للسرعة
اللى البيانات بتتكتب أو تتقرأ من على الميموري.. الدنيا مش سايبة أصلها 

الـClass دا بقى باختصار شديد عبارة عن سرعة الكتابة على الميمورى كارد بوحدة MB/s أو ميجا بايت/ ثانية،
 أو اللى بيسموه "فِئَة الكارت".. مش فصل 

يعنى لو عندك كارت Class 4 مثلا بيكتب فى المتوسط بسرعة 4 ميجابايت / ثانية
 (يعنى لو عاوز تحط عليه ملف 8 ميجا هياخد فى المتوسط ثانيتين علشان يكتبه)

أما Class 10 فبيكتب بسرعة حوالي 10 ميجابايت / ثانية (و أحيانا أكتر من كدة شوية) ..
 يعنى نفس الفايل الـ8 ميجا بيتكتب عليه فى أجزاء من الثانية.

(موجود Class 2 و Class 6 لكن مش منتشرين زي 4 و 10)

كمان ممكن تلاقى الرقم بتاع الـClass مكتوب فى دايرة مش كاملة على العلبة و على الميمورى 

متشتريش ميمورى مش مكتوب عليه Class علشان هتتفاجئ 

----------

يبقى كدة احنا استنتجنا ان Class 10 أسرع فى الكتابة و القراءة عن Class4 و 2 و 6

طيب ليه الشركات بتنتج كروت ميمورى Class 4 أصلا؟!

فى موبايلات و أجهزة كتير قديمة أقصى سرعة بتدعمها هى 2MB/S أو 4MB/s "كحد أقصى"؛ لأن باختصار الأجهزة دى أيام ما نزلت كانت دى قمة التكنولوجيا الموجودة، و كانت السرعة دى كافية جدا لاحتياجات الأجهزة اللى بتستخدم ميمورى فى الوقت دة.. أيام الكاميرات الـ2 ميجا و الـ5 ميجا بيكسل و الفيديو الـ240P 

كمان تكلفة تصنيع الميمورى اللى الـClass بتاعه قليل بيكون أرخص من Class 10 على سبيل المثال
 لأن التكنولوجيا المستخدمة فيها بتكون أقدم.. نتانة بعيد عنك 

----------

طيب لو أنا موبايلى جديد و اتدبست فى ميمورى كلاس 4 أو Class 2.. هل فى ضرر على الموبايل أو الميمورى؟ 

إطلاقا.. أبسنروتلى مفيش ضرر على الموبايل أو الميموري خالص؛ و دا لأن الميموري بيكتب بسرعة ثابتة و الموبايل بيظبط نفسه على كدة

أمال قارفنا ليه يا عم و سَيِّبتِنى كباية الشاى؟ لأن الضرر على مرارتك انت يا ريس ممكن تلاحظ بُطء فى الموبايل لما
 بتنفل بيانات للميمورى أو تقرأ من عليها ملفات كبيرة

أو إنك تكتب بيانات بسرعة كبيرة زي مثلا انك تصور صور كتير ورا بعض بالكاميرا و يكون الدقة بتاعتهم عالية

أو إنك تصور أو تشغل فيديو HD أو أعلى متخزن على الميموري (فى موبايلات بتصور فيديو 4K )،
أو إنك تفتح الـGallery لو عليه حاجات كتير.. هتلاقى الموبايل جاله فشل كلوي 

-------------

تانى نقطة فى هذا البوست الطويل العريض هو معنى SD و SD HC و SD XC و التعاويذ دى 

كروت الميمورى بتكون متقسمة فئات من حيث السعة (بالإضافة للـClass بتاع السرعة طبعا)..
 أمال انت فاكر إييييييييييييييييييه؟ 

عندنا 3 فئات رئيسية لسِعَة الميموري كارد و هما:

SD >> Secure Digital cards

SD HC >> Secure Digital High Capacity

SD XC >> Secure Digital Extended Capacity

------------

إيه الفرق بين الـ3 أنواع دول؟

- النوع الأول "SD" و هو أقلهم من حيث السعة، و بتشتغل على أي موبايل تقريبا.. *مسم* فيييين أيام النوكيا 6120
اللى كان بيشتغل بميمورى 2 جيجا  ، و دا سعته بتتراوح ما بين 128 ميجا بايت لغاية 2 جيجا بايت بحالهم..
 كان افترا أيامها و كانت ميزة بتميز الجهاز 

- أما النوع التانى "SD HC" (أو عالية السعة) فبيمتاز بإنه متوسط السعة (من 4 جيجا بايت لغاية 32 جيجا بايت)
 و مدعوم من معظم الأجهزة الذكية الجديدة الموجودة دلوقتى، لكن طبعا متشتغلش على الـ6120 بتاعى -
 النوع التالت و الأخير هو "SD XC" (أو فائقة السعة) بيمتاز بإن سعته كبيرة جدا، و السعة دى بتتراوح ما بين 64 جيجا بايت لغاية 2 تيرا بايت طبعا العيب الأكبر للنوع التالت (XC) هو إنه مدعوم من أجهزة قليلة،
غالبا أجهزة رائدة زي النوت 4 و 7 (علشان مفيش 6  ) الـS7 و موبايلات سونى و هواوى الرائدة،
و الحاج One Plus و صُحبته  و كل الموبايلات الرخيصة اللى تحت 24 ألف جنيه دى 

و الكاميرات (زي الكاميرات اللى بتصور 4K مثلا)، و دا بغض النظر طبعا عن سعر الكروت دى اللى بيبقى فى متناول تجار المخدرات و مدرسين الثانوية العامة و السادة القُضاة أكثر الله من رواتبهم و بدلاتهم-

- طيب إيه المشكلة لو اشتريت ميمورى بسعة كبيرة و حطيته فى موبايل قديم أو موبايل مبيدعموش؟

ولا حاجة.. الموبايل مش هيشوف الميمورى أصلا! 

و هتعمل زي صاحبنا بتاع الجلاكسى بوكيت و تبيع الموبايل --

فى حاجة كمان اسمها UHS، و دى عبارة عن تكنولوجيا بتخلى الموبايل أو الكاميرا اللى مزودة بالتكنولوجيا دى تستخدم الميمورى بسرعات أعلى من الأجهزة اللى من غيرها، و دا طبعا بشرط إن الميمورى تكون بتدعم الـUHS

فى UHS 1 بيسمح للجهاز باستخدام الميمورى بسرعة 10 ميجا/ث كحد أدنى

و UHS 3 و دا بيخلى الجهاز يستخدم الميمورى بحد أدنى 30 ميجا بايت/ ث، و حاليا تعتبر موجودة
 بشكل أساسي فى الكاميرات الغالية بس