باى باس كوماند ببجى موبايل Command Pubg Bypass بدون باند دخول سيرفر الموبايل

ايه المبهر فى هاتف Xiaomi Mi Mix

بسم الله الرحمن الرحيم

من كام يوم، شركة Xiaomi الصينية أعلنت عن أحدث موبايلاتها: Mi Note 2 و Mi Mix

الاتنين بنفس المواصفات تقريبا فيما عدا بعض الحاجات اللى أهمها الشاشة 

لكن بما إن معظم الناس اتكلمت عن الـMi Note 2 و قالوا إنه موبايل بتشيبست Qualcomm Snapdragon 821 

و رام 4 أو 6 جيجابايت على حسب السعة الداخلية اللى هتاخدها، سواء 64 جيجا أو 128 جيجا

بالإضافة لشاشة بقياس 5.7 إنش منحنية من الجنبين (يا ترى شفت الشاشة دى فين قبل كدة؟  )

و طبعا برضو مش محتاج إنى أقولك إن الموبايل بكاميرا خلفية دقتها 22 ميجابيكسل و بفتحة عدسة F2.0
 و كاميرا أمامية 8 ميجابيكسل و مزودة بـAutoFocus (و دا مبنلاقيهوش فى موبايلات كتير)

بطارية 4070 ميللى أمبير ساعة بتدعم Qualcomm Quick Charge 3.0 بالإضافة للـNFC و الحبشتكنات اللى احنا عارفينها دى 

----

لذلك أنا مش مضطر أقولك على مواصفات النوت 2 خالص 

قشطة.. خلى الناس تستفيد برضو 

-----

كمان الناس كلها اتكلمت على Xiaomi Mi Mix، و اللى بيجى بنفس التشيبست و 4 جيجا رام و 64 جيجا سعة داخلية،
أو 6 جيجا رام و 256 سعة داخلية (عالم كفرة بصراحة يعنى )

بس المختلف هنا هو إن الموبايل بشاشة 6.4 إنش واخدة 91% من وش الموبايل؛ لذلك مفيش حواف
 غير شِفَّة رفيعة تحت فيها الكاميرا الأمامية بتاعة بوز البطة 

بالإضافة للفرق فى البطارية اللى بتيجى بسعة 4400 ميللى أمبير ساعة

--

كل دا الناس اتكلمت عنه فى كل حتة، و أكيد حد قالك إنه شبه موبايل Sharp Aqueous اللى نزل
 من فترة كبيرة و كان بنفس الفكرة تقريبا، و لو محدش قالك آدينى قلتلك 

--

الجديد بقى إن الموبايل دا لو مسكته و قعدت تفَلِّى فيه مش هتلاقى أهم حاجتين فى أي موبايل
 حتى لو كان موبايل من ابو أربعة جيه و ربع 

الموبايل مفيش فيه سماعة مكالمات ولا Proximity Sensor!!!!!!!!!!!!

معقولة موبايل بالسعر دا و المواصفات دى مفيهوش الحاجات التافهة دى؟! 

(فعلا الحاجات دى مش موجودة فى الموبايل بالشكل اللى احنا عارفينه  )

يا راجل دا حتى الموبايل الشارب اللى بقولك عليه دا كان فيه سماعة مكالمات و مستشعر قرب بس من تحت
 و كنت بتقلبه رأسا على عقب و تتكلم فيه من تحت  (و متفهمنيش غلط فى الجملة الأخيرة دى)

من ضمن الإبداع اللى اتعمل فى Mi Mix إن مفيش فيه الـProximity Sensor اللى نعرفه،
 و اللى بيشتغل بالأشعة تحت الحمراء بالمناسبة علشان لو مكنتش تعرف يعنى 

بدل مستشعر القرب اللى نعرفه، و اللى لازم يكون ظاهر بشكل ملحوظ فى فريم الموبايل علشان يبعت أشعة تحت حمراء
و يرجع يستقبلها، استخدموا مستشعر قرب بيشتغل بالموجات فوق السمعية (زي السونار اللى بيبقى عند الدكتور دا)
 و بالتالى أمكن إنهم يحطوه ورا الشاشة الضخمة اللى مسيطرة على الموبايل بشكل كبير،
 و بيشتغل بإنه يبعت موجات صوتية و يرجع يستقبلها عادي جدا 

أما بالنسبة لسماعة المكالمات فانت أكيد عارف إنها بتبقى محطوطة فى حفرة فى الفريم بتاع الموبايل 

لكن هنا استخدموا حاجة اسمها "cantilever piezoelectric ceramic acoustic technology" 

و متسألنيش يعنى إيه علشان أنا واخدها كوبى و بيست 

لكن الفكرة من الافتكاسة دى هو إن الفريم كله بيتهز بذبذبات معينة؛ و بالتالى الفريم بتاع الموبايل كله بيبقى
عبارة عن سماعة بتطلع الصوت بمجرد ما الـProximity Sensor اللى مستخبى ورا الشاشة
 يعرف إنك قربت خلقتك الكريمة من الموبايل 

فتقوم السماعة اللى مستخبيى ورا الشاشة (برضو)  تبعت ذبذبات للفريم اللى انت حاطط ودنك عليه
 علشان يشتغل كسماعة و تسمع اللى بيكلمك من الشاشة عادى جدا 

--

بصراحة فى رأيى إن الموبايلين دول كويسين، لكن الـMi Mix أفضل من الـMi Note 2، خصوصا إن السوفتوير
 بتاع شاومى (MiUI) مبيستفيدش من الانحناء اللى موجود فى الشاشة دا زى ما سامسونج عملت
 فى سلسلة الـEdge أتمنى الموبايلين دول يوصلوا مصر بسلامة الله و إن أسعارهم متكونش فى مستوى
 تجار الممنوعات زي باقى الموبايلات الموجودة دلوقتى 

اتمنى يكون الموضوع عجبكم و متنسوش تشتركو فى النشرة البريدية للمدونة لمتابعه كل جديد