باى باس كوماند ببجى موبايل Command Pubg Bypass بدون باند دخول سيرفر الموبايل

تعرف ايه عن الFile System ؟

بسم الله الرحمن الرحيم

عمرك سمعت عن حاجة اسمها File System؟ 

بص يا سيدى.. أنا هحكي لك حكاية أعتقد إنها مش مهمة خالص بالنسبالك  و بعدها هقولك أنا عاوز إيه بالظبط.. ماشي؟
 قول ماشي يا عم الحاج 

صحصح معايا كدة  

واحد صاحبى كان عاوز منى شوية حاجات على فلاشة (و متفهمنيش غلط فى كلمة فلاشة دى ) 

المهم إن الملفات دى كنت حاططها فى ملف مضغوط، و قلت أحطها على الفلاشة و هو ينقلها على موبايله و آخد فلاشتى
و أنا مروح وخلصنا.. على اعتبار إن معايا فلاشة OTG و كنت جايبها أيام الرُخص بـ55 جنيه و كدة 

هختصر حاضر.. متزعقش طيب 

المهم يا ريس إن اللى حصل هو إنى حطيت الحاجة على الفلاشة و هى متفرمتة NTFS،
و لما وصلناها بالموبايل قالنا الفلاشة بايظة و عاوزة تتفرمت 

يا ابنى يهديك يرضيك.. أبدأ 

هى بايظة و لازم تتفرمت 

قلت طيب.. ممكن ياخدها معاه يجرب على الكمبيوتر بتاعه و يجيبها تانى يوم

و كانت المفاجأة.. تا تا تا تاااااا

الفلاشة اتقرت و اشتغلت و خد الحاجة اللى عليها و نقلى عليها حاجات تانية و الدنيا كانت زبادي فى الخلاط  

رجعت البيت و قعدت أتأمل و أتأمل و أتأمل و أتأمل و... (خدت وقت كتير شوية فى التأمل ) 

و بعدين أدركت إن الأندرويد المبني على نواة لينكس مبيقرأش الـNTFS بتاع ميكروسوفت  

قول عروستى بقى 

-

الـFile System دا عبارة عن نظام معين لقراءة و كتابة الملفات على ذاكرة الجهاز اللى بتستخدمه؛
و للأسف بيختلف من نظام تشغيل للتانى 

يعنى هديك مثال بحاجة بسيطة.. لو انت عندك مكتبة على أول الشارع بترتب الكتب ترتيب أبجدي بغض النظر
 عن محتوى الكتاب أو المجال اللى بيتكلم عنه، و انت بتروح المكتبة دى من صغرك تجيب الكتاب اللى انت عاوزه..
هيبقى سهل جدا توصل للكتاب اللى انت عاوزه حتى و انت مغمض  

لنفرض إن الزهر لعب معاك و سافرت أمريكا و دخلت أكبر مكتبة فى العالم.. مكتبة الكونجرس الأمريكي 

هتلاقى نظام ترتيب الكتب هناك حسب المجال أو العلم اللى هى تابعة له.. إقنعنى بقى إنك هتعرف توصل للكتاب
 اللى انت عاوزه بالإسم من غير مساعدة  تكون الفترة الرئاسية لطنطك هيلارى انتهت و ترامب
بيجهز لانتخابات المحليات تبع الوحدة المحلية لمركز ومدينة نيويورك 

نفس الحال بالنسبة لموضوع File Systems؛ حاليا 

كل نظام بيعتمد على File System معين بشكل افتراضي، و بيواجه مشاكل لو وصلت عليه
 أي حاجة متفرمتة بـFile System مختلف

هو أنا مقلتلكش يعنى إيه File System أصلا؟  

طاااايب.. من حدوتة المكتبة اللى قلتلك عليها دى هنستنتج إن الـFile System عبارة عن نظام معين
 بيتقسم بيه الهارد لأجزاء صغيرة (زي ما المكتبة بتتقسم رفوف) و بتترص فى الأجزاء دى الملفات بترتيب معين،
 بحيث يقدر نظام التشغيل إنه يوصل للملفات دى بمعرفته، و دا بيضمن إنك تلاقى الملفات بسرعة أكبر
 أو تستخدم هاردات بمساحة أكبر أو كدة

كل الكلام اللى فوق دا جميل و الدنيا وردي، لكن المشكلة فى الموضوع إن مش كل الأنظمة
 بتتعامل مع كل الـFile Systems بنفس الكفاءة، و كل نظام بيبقى ليه نظام تشغيل مفضل
(بمعنى أصحّ على الحِجر )، و بيظبط حاله و محتاله إنه هيشتغل بيه و بس

نيجى لأول File System من حيث الظهور، و اللى كانت كل أنظمة التشغيل شغالة بيه أول ما ظهرت..
 نظام File Allocation Table ،أو FAT

فى النظام دا الهارد بيتقسم Clusters أو تجمعات، على كل Cluster بيتخزن بيانات و ملفات معينة،
و بعد كدة بيبقى موجود حاجة زي جدول كدة بيقولك كل جزء من الملف اللى انت عاوزه محطوط فى أي Cluster،
 و يرجع يجمع الأجزاء من الـClusters المختلفة علشان تستخدمه.. حاجة قمة فى البدائية بصراحة 

الميزة العظيمة للنظام دا هو إنه مدعوم من كل أنظمة التشغيل، سواء قراءة أو كتابة الملفات و الدنيا عنب

عيوب النظام دا هو إنه بيضيع مساحة بالعبيط لأنه مبيعرفش يملا الـClusters دى على آخرها ، كمان كانت أقصى سعة بيدعمها لأي بارتشن على الهارد 2 جيجابايت (حاليا ممكن تصور فيديو 10 دقايق من كاميرا موبايلك و يبقى أكبر من كدة  )

بصدور ويندوز 98 ميكروسوفت طورت الـFAT و عملت FAT 32، و اللى لسة بيستخدم على معظم الفلاشات لغاية دلوقتى،
 و المميز فيه عن الـFAT القديم هو إنه بيدعم سعات لغاية 2 تيرا.. الموضوع حاليا مش واو أوى يعنى  بس لاحظ
إن الكلام دا فى سنة 1998 ، بس الغباء الحقيقي بقى إنه مبيدعمش إنك تحط عليه ملف أكبر من 4 جيجا..
طيب دا ينفع؟ الحلو ميكملش يا جماعة، دا لو اعتبرناه حلو يعنى 

و بعدين جت طنطك ميكروسوفت و قالت: يا رجالة.. يا رجاااالة  إحنا لازم نعمل File System جديد علشان
يدعم سعات أكبر و يستخدم المساحة الموجودة بكفاءة أكبر، و يدعم مميزات أكتر زي دعم تشفير الملفات
 و منع فقد البيانات و استقرار أكبر، و دعم ملفات أكبر من 4 جيجا علشان الأولاد يتفرجوا
على فيديوهات 720P و يلعبوا Fifa 2003 براحتهم 

و راحت عاملة نظام جديد و مسمياه New Technology File System أو NTFS..
شوف يا أخى الثقة بالنفس ممكن تعمل إيه  

المهم إن الـFile System دا كان و ما زال كويس جدا؛ و دا خلاه الـFile System اللى
 بتشتغل بيه كل إصدارات ويندوز من أول XP لغاية دلوقتى 

العيب القاتل للنظام دا هو إنه مش متوافق مع أنظمة التشغيل التانية، سواء Mac OS أو معظم توزيعات لينكس،
و الأندرويد و بعدين بظهور كروت ميمورى بسعات كبيرة ظهر File System اسمه EX FAT ،
و دا واخد مميزات التوافق مع أنظمة التشغيل المختلفة من FAT و FAT32، و مميزات السعات
 و الملفات الكبيرة من NTFS، و سابوا المميزات الزيادة فى NTFS زي ضغط الملفات و الكلام الفاضي
 دا لأنك مش هتطلع الفضاء بالميمورى بتاعك 

و مع ذلك برضو EX FAT مش متوافق مع أنظمة التشغيل القديمة زي MS DOS و الإصدارات الأولى من ويندوز XP
(دا لو حد عنده فلاشة أو ميمورى كبير جدا و بيشتغل لسة على ويندوز XP) 

بالنسبة للخالة آبل فبتستخدم نظام ملفات اسمه Hierarchical File System Plus (أو HFS+)،
و دا زي الـNTFS بالظبط من حيث المميزات، و من حيث العيب القذر برضو إنه مش متوافق مع أي حاجة تانية
 غير Mac OS X و iOS (دا لو اعتبرنا الإسم نفسه مش عيب)

أما عن توزيعات لينكس فحدِّث ولا حرج 

بسبب التوزيعات الكتييييييير جدا المبنية على نواة لينكس، بقى عندك عائلات من الـFile Systems 

زي ext* family، و اللى منها ext2 و ext3 و ext4

و عندك كمان XFS و JFS و ReiserFS و btrfs و غيرهم 

طبعا مش محتاج أقولك إن التعاويذ دى كلها متوافقة مع توزيعات Linux بس و لو حاولت تشغل عليها
 نظام تشغيل تانى ممكن يتفّ عليك 

ممكن تغير الـFile System اللى بيشتغل بيه فلاشة أو هارد إكسترنال أو حتى بارتشن من الهارد بتاعك عن طريق إنك تدوس كليك يمين على البارتشن أو الديسك دا و تختار Format و تختار الـFile System اللى انت عاوزه عادي
 جدابس خلى بالك إن Format دى هتشيل من على الفلاشة أو البارتشن أي بيانات أو ملفات أو سكر نبات
علشان لو ملقيتش السكر بتاعك فى الفلاشة مترجعش تقولى انت السبب 

الخلاصة_فى_مصاصة 

لو عندك فلاشة أو ميمورى و عاوز تفرمتها خليها EX FAT علشان تاخد أكبر قدر من المميزات و التوافق 

اتمنى يكون الموضوع افادكم و متنساش تشترك فى النشرة البريدية اسفل الموضوع