باى باس كوماند ببجى موبايل Command Pubg Bypass بدون باند دخول سيرفر الموبايل

انواع شاشات اللمس Touch Screen الفرق بين IPS LCD - AMOLED

اخواتى و احبائى الكرام متابعينا فى كل مكان سوف نتكلم فى هذا الموضوع عن واحد من المواضيع المهمة و المشهورة على الأنترنت كما نعلم شاشات الهواتف الذكية الأن و ييعتبر 90% من الهواتف الذكية او أكثر اصبحت الأن تعمل بشاشات اللمس اذا فى هذا الموضوع سوف نتعرف على جميع انواع شاشات اللمس Touch Screen الفرق بين IPS LCD - AMOLED سوف يكون هذا الموضوع متكامل و به جميع المعلومات المهمة و المفيدة و التى يجب ان تعرفها فى شاشات الهواتف الذكية ..

بسم الله الرحمن الرحيم

هتكلم معاك باختصار شديد عن أشهر نوعين من شاشات اللمس (أو الـTouch Panels)

و هما Resistive Touch Screen (شاشات المقاومة)
و Capacitive Touch screen (شاشات اللمس بالسعة)

أو خلينى أقولك بالبلدي كدة.. تاتش سكرين و رَفص سكرين 

--------------

شاشات المقاومة أو الرفص سكرين

الشاشات دى تعتبر النوع الأقدم من شاشات اللمس، و دى كانت منتشرة فى الموبايلات لغاية 2007 أو 2008 مثلا،
و لغاية دلوقتى موجودة فى شاشات الطابعات الكبيرة و مكن التصوير و مكن الـATM القديمة

مين فينا ميعرفش النوكيا 800 Xpress Music؟ أيوة اللي بترفصه دا 

أهو دا بقى أفضل مثال لشاشات المقاومة 

مبدئيا: النوع دا من الشاشات بيتكون من إيه؟

بيتكون يا سيدي من طبقتين إزاز بينهم فراغ حوالي 1 ميللي أو 2

الطبقتين دول بيبقوا واحدة فيها أقطاب كهربية مرصوصة على الجناب و التانية فيها أقطاب كهرببة (زي اختها بالظبط)
لكن على الطرف العلوي و السفلي.. طبعا الطبقتين دول فى الغالب مفيش بينهم توصيل كهربا،
أو بمعنى تانى الدايرة الكهربية مفتوحة بينهم 

طيب.. إيه اللي بيخلى الشاشة دى تعرف ان انا لمست الشاشة؟ (أو بمعنى أصح رفصتها ) 

شوف يا سيد الناس.. عارف صوابعك اللي زي صوابع زينب دي؟  ما شاء الله! عندك 10 صوابع؟  لما "بتضغط"
بواحد منهم على الشاشة بتقرب انت الطبقتين (اللي اتكلمنا عليهم فوق) من بعض لغاية ما يلمسوا بعض..
 لمسوا بعض.. إيه اللي حصل؟ 

اللمسة (أو الرفصة) اللي حضرتك عملتها فى الشاشة قربت الأقطاب الطولية من الأقطاب العرضية،
فعملت حاجة زي شبكة بيانية اتحدد عليها مكان لمسك للشاشة

مميزات :

- من مميزاتها انك بتشتغل عليها بأي حاجة، حتى لو مسمار أو حتة عصاية من الشارع 

- كمان بتبقى الشاشات دى جامدة زي الزلطة و بالتالي كسرها بيبقى حاجة صعبة جدا (علشان لو اترفصت جامد) 

عيوب:

- مبتدعمش اللمس المتعدد (يعنى متعرفش تعمل زوم للصور بصباعين ) متخيل المأساة؟ 

- ناشفة جدا فى التعامل معاها (عاوزة تترفص علشان تشتغل)

- بتمتص جزء كبير من إضاءة الشاشة (الربع تقريبا)، و دا اللي بيخلى مستوى السطوع بتاعها أقل من النوع
 التاني بكتير شكلها بيبقى قذر لما بتستخدمها فترة.. عارف لما بتحط حتة مشمع على حاجة و تتكرمش؟
أهي كدة بالظبط  (و لو دكر حطلها Screen protector)

- غير دا كله ان سمكها كبير بدرجة كبيرة؛ فبيكون سمك الموبايل كبير بشكل ملحوظ 

------------

شاشات اللمس بالسعة Capacitive

و النوع دا منتشر حاليا فى معظم الأجهزة الذكية، و اللي آبل و LG بيقطعوا فى بعض على مين اللي ابتكرها 

و دى فكرتها ان الشاشة بتكون مكونة من إزاز متغطى بمادة موصلة شفافة، و بيمشي فيها تيار كهربي بسيط جدا،
 جسم الإنسان بقى يعتبر موصل جيد للكهرباء، لذلك أي لمسة (مش شرط رفصة ) بتعمل اضطراب فى الإلكترونات
 اللي على الشاشة؛ فالموبايل بيترجم الاضطراب دا على إنك لمست الحتة دي 

مميزات :

- السمك رفيع جدا مقارنة بالنوع التاني

- امتصاصها للضوء حوالي 10 % بس، لذلك بتديك درجات سطوع عالية 

- بتدعم اللمس المتعدد؛ لذلك التعامل معاها بيكون اسهل بكتير من النوع التاني 

- حساسة جدا للمس؛ يعني مش لازم ترفصها 

- مبتتبهدلش زي شاشات المقاومة، و ممكن تلزق عليها سكريناية 

عيوب:

- أضعف شوية من حيث المتانة من شاشات المقاومة 

- تكلفة إنتاجها أكبر من شاشات المقاومة؛ لكن حاليا مفيش حد لسة معتمد على شاشات المقاومة D

- بتتأثر بالمياه و الأتربة و العرق.. هو العرق ابن الكلب دا ؛ و دا بيأثر على دقة التقاطها للمس

------

فى حاجة اسمها Force Touch أو 3D Touch ظهرت فى موبايلات زي
 هواوى Mate S و iPhone 6s و 6s Plus

و دى بتبقى شاشات كاباسيتيف عااااااادى خالص، بس تحتها Sensors (أو حساسات) للضغط..
 قال إيه علشان لو رفصت رفصة خفيفة غير لو رفصت رفصة جامدة 

طبعا دول عالم كفرة و هيبقوا حطب جهنم 

--

بالنسبة كمان لموضوع اللمس المتعدد.. كل ما عدد نقاط اللمس زادت.. كل ما كانت حساسية الشاشة أكبر للمس؛
و علشان كدة فى أي ريفيو لازم تلاقى الناس بتتكلم عن الـMulti-Touch