باى باس كوماند ببجى موبايل Command Pubg Bypass بدون باند دخول سيرفر الموبايل

ما معنى Retina Disply الخاصة بApple

بسم الله الرحمن الرحيم

مبدئيا كدة.. شاشات الـRetina Display لغاية دلوقتى من نوع IPS-LCD، و فى كلام عن
 إن شاشة iPhone 7 هتكون شاشة AMOLED لكن منقدرش نجزم بالكلام دا إلا لما نشوفه و نتأكد 

يعنى الشاشة من نوع عادى و معروف أهى.. أمال موضوع الـRetina دا جه منين؟ 

أقولك 

لغاية 2011 كانت الأجهزة اللى فيها شاشات (و بالذات الموبايلات) دقة الشاشة بتاعتها أي كلام؛ لذلك كان
 سهل جدا إنك تشوف الـPixels بتاعة الشاشة بعينك كدة و انت بتستخدم الموبايل، و دا كان مقرف طبعا فى
 قراءة النصوص و الحاجات دى.. لكن كان فى الفترة دى المهندسين فى شركة Apple قدامهم تحدى كبير..
 هو إنهم يعملوا موبايل بشاشة كويسة و فى نفس الوقت موفرة فى استهلاك الطاقة و ميبانش فيها الـPixels

فعملوا شوية تجارب ، و فضلوا يدوروا فى الكتب لغاية ما وصلوا للقاعدة اللى اتبنى عليها اختبار النظر
 اللى بتعمله عند دكتور العيون (اللى هو دواير مفتوحة من ناحية واحدة و انت تعرف هى مفتوحة منين و كدة  )

الرسومات بتاعة اختبار النظر دى اللى عملها طبيب عيون ألماني اسمه Snellen، و عمك Snellen
دا كان استخدم حقيقة إن العين البشرية علشان تقدر تفرق بين نقطتين لازم يوصلوا للعين بشعاعين ضوء مختلفين
 الزاوية بينهم درجة واحدة.. فهمت حاجة؟ 

لنفرض إن عندنا عين معايلك و نقطتين على بُعد معين عاوز تشوفهم نقطتين.. هتروح راسم مثلث بين عينك
 و النقطتين بحيث إن زاوية راس المثلث تكون عند عينك.

لو الزاوية اللى عند عينك دى قياسها أكبر من درجة واحدة على المنقلة يبقى انت ممكن تشوف النقطتين دول عادى

لكن لو قياسها أقل من درجة واحدة؛ فى الغالب هتشوفهم كنقطة واحدة أو مش هتشوفهم خالص  

--

المهم.. الجماعة بتوع Apple دول قالوا خلاص .. مش أصغر زاوية بين شعاعين ممكن العين تميزهم هو درجة واحدة؟
نشتغل على أساس إننا نخلى الـPixels قريبة من بعضها بحيث إنها تكون أصغر و أقرب لبعضها من
إن عين الإنسان تعرف تميزها 

- و قرروا إنهم بدل ما يستخدموا وحدة PPI (أو Pixels Per Inch) لوصف جودة و دقة شاشاتهم
 إنهم يستخدموا PPD (أو Pixels Per Degree) 

- وجهة نظرهم فى كدة إنك مبتستخدمش الموبايل على نفس المسافة اللى بتستخدم فيها اللاب على سبيل المثال؛
يعنى بتقرب الموبايل من خِلقِتَك

- المساحة اللى بتمثلها الـDegree دى بتختلف باختلاف المسافة بينك و بين الشاشة اللى انت بتبصلها
 (تناسب طردي بالمناسبة  )

- المهم إن الجماعة بتوع آبل ربنا وفقهم و عملوا الشاشات دى فى موبايل iPhone 4S،
و كانت شاشته 3.5 إنش بدقة 640*950 بيكسل

- و طلع Steve Jobs المدير التنفيذي للشركة وقتها و قال إن عدد البيكسلات فى البوصة المربعة اللى
 الإنسان ميقدرش يفرقها ولا يميز كل بيكسل لواحده هو 300 PPI لو هتستخدم الجهاز من مسافة 10 لـ12
 إنش (بتاع 30 سم كدة  ).. و إن الأرقام دى على حسب التجارب و الأبحاث اللى عملوها
 (خلى بالك إن فى نظريات و أبحاث كتير جدا بتتعارض مع Steve و بتقول إن المفروض الرقم يكون أكبر من كدة،
و إن الرقم دا هو جايبه من عند خالته علشان لقاه ماشى مع الموبايل أبو 326 PPI  )

--

لو طبقنا كلام Steve على موضوع الـPPD هنلاقى إنك محتاج حوالي 57 PPD علشان متشوفش البيكسلات
 فى أي جهاز 

بمعنى إن المساحة اللى بتشغلها الـDegree فى شاشة موبايل مثلا قول بتاع 1/2
سم مربع مثلا (مثلا مثلا يعنى  )

يبقى إحنا محتاجين فى النُص سنتى دا 57 بيكسل علشان الشاشة تبقى نقية و متشوفش البيكسلات واضحة.

طيب.. على فرض إن اللاب هتحطه على مسافة أكبر من عينيك.. يبقى المساحة من الشاشة اللى هتشوفها بزاوية درجة
 واحدة هتكون أكبر.. قول مثلا 1 سم مربع.. يبقى انت محتاج فى المساحة دى كام بيكسل؟

لو قُلت 114 هقوم أحدف نفسى من الشباك 

هتحتاج برضو 57 بيكسل فى المساحة دى علشان متشوفش الشاشة مبكسلة
(على الرغم إن المساحة فى اللاب أكبر)

---

بالإضافة لكدة عملوا شوية حبشتكنات بحيث إن البيكسل اللى بلون مختلف يكون حواليه بيكسلات "بتخَدِّم عليه" أو بمعنى
 تانى بتكتسب ألوان بين البيكسل دا و البيكسل اللى جنبه علشان الصورة تطلع نقية و متحسش إن الصورة
 عبارة عن بيكسلات جنب بعضها و كل واحد بلون شكل 

--

أما بالنسبة للإسم فإسم Retina Display اختاروه علشان التقنيان اللى استخدموها مستوحاة من طريقة
استقبال شبكية العين (اللى هى الـRetina ) للصور؛ و بالتالى طوروا الشاشات بتاعتهم على أساسها