باى باس كوماند ببجى موبايل Command Pubg Bypass بدون باند دخول سيرفر الموبايل

يعنى ايه International Mobile Station Equipment Identity

بسم الله الرحمن الرحيم

المهم إن انا عاوز أكلمك شوية عن الـIMEI أو (International Mobile Station Equipment Identity)

البتاع الطويييييييل دا معناه بالعربي "الهوية الدولية للأجهزة المتنقلة".. أعتقد كدة انت فهمت 

طاااايب يا سيدى 

المصطلح دا زي ما انت مش عارف كدة يعتبر هو موبايلك فعليا!

بمعنى إن موبايلك من غيره يبقى بالظبط عبارة عن حتة حديدة مبتعملش مكالمات ولا بتدخل على النت  خالث 

-

دا بيكون عبارة عن عدد مكون من 15 رقم تبع خوارزمية اسمها Luhn Algorithm

الخوارزمية دى لو شرحتلك بتشتغل إزاى هنقعد من هنا للسنة الجاية و مش هتفهم برضو 

المهم.. إن مش أي رقم ممكن يبقى IMEI لأنه لازم يكون بتتابع الخوارزمية دا علشان أبراج الشبكة تقبله
و تبدأ تتعامل معاه 

أبراج الشبكة؟!

هو انا مقلتلكش؟ 

مش الرقم دا موجود فى كل موبايل؟

و إيه رأيك بقى إن مفيش موبايلين على وجه البسيطة لهم نفس الرقم؟ 

لذلك هو المسئول عن تعريف جهازك (سواء موبايل أو تابلت أو حتى فلاشة نت) على الشبكة  آه و الله! 

لأ و كمان إيه.. الرقم دا هو المسئول عن تتبع موبايل ما لما يبقوا عاوزين يتتبعوه، و هو اللى بتقفل منه
 أي موبايل مسروق و بتمنعه من استخدام شبكات الاتصالات

-

لو الرقم دا يسطا اتمسح أو اتغير؛ يبقى على الموبايل السلانكاتيه 

لو معاك موبايل سامسونج فغالبا بيانات الـIMEI بتتخزن فى فولدر اسمه EFS على الروت بتاع السيستم،
 و ممكن لو بتفلش روم يبوظ الـIMEI عااااااااادى خالص.. و الموبايل ميلقطش شبكة 

لذلك أنصحك نصيحة أخوية يعنى بإنك تاخد من الفولدر دا نسخة قبل ما تعمل أي حاجة فى الموبايل 

--

الـIMEI مبيتغيرش بتغير إصدار السوفتوير ولا الروم ولا أي حاجة.. تقدر تقول إنه بيبقى لازق فى جتة الموبايل
 زي الجَرَب 

لو حصل حاجة فى الـIMEI بتاع الموبايل اللى معاك هتضطر تفَلِّشه بحاجة اسمها Box (أو بوكس )

و دا بيكون غالي و صعب تلاقيه غالبا.. لكن ممكن لو لاقدر الله حصل حاجة للـIMEI تروح لأي محل موبايلات
 و تستخدم البوكس بتاعه و برنامج اسمه 3DX علشان تنجز هذه المهمة التاريخية 

-

فى دولة زي إنجلترا تغيير الـIMEI جريمة يعاقب عليها القانون  (بجد مش هزار)

-

الموبايل اللى بيشتغل بشريحتين بيكون له اتنين IMEI.. لكل شريحة واحد خاص بيها.. مش شيرز و كل واحد هيلبسه شوية 

-

ممكن تشوف الـIMEI بتاع موبايلك عن طريق إنك تدخل الكود دا فى أبلكيشن الـPhone

*#06# (نجمة - هاش - صفر - شتة - هاش)

(الهاش دا اللى هو الشباك )

-

كان فى شائعة بتقول إن مش عارف الرقم الكام من الـIMEI بتاع موبايلك بيقولك هو تقفيل إيه و العك دا 

الموضوع دا على الرغم إنه بهتان و إثم عظيم إلا إن زمان قبل 2003 كان الـIMEI له دلالات زي دى
 (بس طبعا مش بمستوى العبقرية اللى بنشوفه دا  )

بس يا سيدى.. هو دا الـIMEI