التطبيق الرسمى واتس اب يعلن عن مجموعة من المميزات الجديدة لتطبيقة

هل تعلم ما معنى كلمة مزارع المحتوى ؟ Content farms

مزارع المحتوى، أو Content farms من الحاجات المنتشرة بشكل كبير جدا الفترة اللى فاتت دى، و أكيد انت شفت مزارع المحتوى دى قبل كدة كتير.. لا شفتها.. تعالى أقولك بقى مممن تكون لقيت المزارع دى فين 

---

تبقى قاعد كدة فى أمان الله على الفيس زي أي شاب منحرف عنده تأخر فى الوعي الإدراكي (أنا بقول أي كلام على فكرة ) 

و بعدين تلاقى ظهر بوست بالمنظر اللى بعد الخط التخين اللى جاي دا 

/////////////////

عاجل: شاهد قبل الحذف: فضيحة الفنانة أم أحمد مع أبو أحمد فى الحمام 

لن تصدق ما حدث 

للتفاصيل اضغط هنا 

www.علمنى العوم و النبي يا أحمد.com

(و معاها صورة للفنانة أم أحمد و عينيها مبكسلة و سهم بيشاور على أي حاجة فى الصورة ) 

/////////////////////

فانت شأنك شأن أي شاب بايظ فاسد تفتح اللينك علشان تشوف أم أحمد بالسالوبت فى الحمام.. يا بايظ 

اللينك دا بيكون عبارة عن موقع أي كلام كدة فيه كمية إعلانات غير طبيعية 

فى وسط الإعلانات دى تلاقى لينك صغير مكتوب عليه "اضغط هنا لقراءة الموضوع كاملا" 

تروح تضغط تلاقى إيدك ضغطت بالغلط على إعلان مثلا، أو ربنا يوفقك و تعمل Click على اللينك اللى هو جايبهولك فيروح فاتحلك صفحة تانية و معاها تسعين إعلان تانيين 

و الصفحة اللى تتفتح دى تلاقى فيها pop-ups لإعلانات تانية بالعبيط، و تلاقى Click Ads و بلاوى سودة 

علشان فى الآخر يقولك: انتشرت شائعة عن إن أم أحمد و أبو أحمد اتمسكوا فى الحمام، لكن أم أحمد طلعت نفت الموضوع 

-----

مبدئيا.. إيه هي مزارع المحتوى دي؟ 

مزارع المحتوى دى بتكون عبارة عن شركات أي كلام أو ناس فاضية بتعمل مواقع أي كلام برضو، و بتبدأ توظف ناس شغلتها تكتب مقالات عبيطة ملهاش أي لزمة و يحطولها عناوين تشد القارئ علشان يفتح اللينك، و فى نفس الوقت يعاموهم إزاي يضحكوا على محركات البحث و يخلوها تشتغل لحسابهم 

و يقوله مثلا: هتكتب المقال على عَشَّة جنيه  يعنى لو كتبت عشر مواضيع فى اليوم هتاخد 100 جنيه فى اليوم،
يعنى 3000 جنيه فى الشهر و انت قاعد برنسيس فى نفسك كدة مبتعملش أي حاجة ليها لزمة فى الوجود 

-

بعد كدة بيبدأ يحط المواضيع دى على الويبسايت الزبالة بتاعه و يملاه إعلانات، و يحط فيه لينكات لصفحات تانية جوة الموقع نفسه، و مع اللينكات دى إعلانات تاني، و فى الصفحات دى لينكات تانية جوا الموقع، و إعلانات تالت،
 و إعلانات رابع 

بس.. الموضوع بيعتمد على إنه يسحب الزبون جوة الموقع بتاعه و ينفخه إعلانات بحيث يكسب من وراه بأكبر قدر ممكن، مش مهم بقى يستفيد حاجة ولا يتحرق 

أهم حاجة إنه يدخل الموقع و يضغط على لينكات علشان يحقق Rank
 عالي للموقع، و يدوس على إعلانات علشان يجيب فلوس، و شكرا مش عاوز حاجة من خلقتك غير كدة 

-

طيب الموضوع دا له أضرار؟ إيه المشكلة يعنى إنه يعمل فلوس على قفا الناس و محركات البحث؟ ما يتحرقوا فى روس بعض 

هقولك أنا المشكلة فين 

- لنفترض جدلا إنك بتدور على موضوع معين أو مقال ما عن حاجة معينة.. تدخل على عمك جوجل تكتب الحاجة اللي انت عاوزه يدورلك عليها، و هوووووب تلاقى حاجة ملهاش أي لزمة ولا ليها علاقة بالموضوع ظهرت فى نتايج البحث الأولى 

الموضوع دا بيحصل، و النتايج دى بتظهر لأن المواقع دى بتستخدم Tags بالعبيط ملهاش أي علاقة بموضوع المقال ولا محتواه ؛ و بالتالي محركات البحث "بتتزاول"  و تعرضلك نتايج أي كلام، و مع الوقت هتبدأ كفاءتها تقل و محدش يعتمد عليها 

- محركات البحث تفضل تاخد على قفاها كتير؟  أبدا.. تقوم مواقع البحث تغير من سياسات اكتشاف و عرض الصفحات فى نتايج البحث؛ و بالتالى مواقع و صفحات كتير فيها معلومات عن مواضيع معينة بتبدأ تختفى من نتايج محركات البحث لأنها تعتبر تبع النظام القديم.. علشان بتاع الزريبة يتبسط 

- غير كدة كمان.. المواقع دى بتستخدم الخدمات الإعلانية المدفوعة زي Google Adsense علشان تعرض الإعلانات و تلم الفلوس  فطبيعي إن الخدمات الإعلانية دى تتغابى فى شروط قبول ناس جديدة ضمن أنظمة الإعلان بتاعتهم؛ و دا طبعا بيخلق مناخ تشاؤمي للناس اللى عندهم محتوى نضيف و مبيعرفوش يكسبوا من وراه ولا بيعرفوا يقدموا خدمات زي الناس لأن مفيش مقابل للى بيعملوه.. بيشتغلوا بلْوشي 

- كمان لو انت عندك موقع محترم بتعرض عليه محتوى نضيف و مبتلعبش على مواقع البحث زي زرايب المحتوى  هتلاقى الترتيب العالمي للموقع بتاعك بيقل باستمرار؛ و ليحل محله المواقع اللى ملهاش لزمة دى لأن باختصار عدد زوار المواقع دى أكتر من عدد زوار موقعك بكتيييير جدا؛ و بالتالي مش هتعرف تكسب حاجة من الموقع بتاعك ولا هتعرف تحسن من مستواك طول ما انت محترم 

- تقوم إيه.. مواقع الأخبار و المواقع اللى المفروض تقدم محتوى نضيف و هادف تتحول هي كمان لمزارع محتوى، و تقدم أي حاجة فى رغيف لمجرد إن الـTraffic بتاعها ميقلش؛ و بيبدأوا يكتبوا عن أي حاجة تافهة ملهاش لزمة و يعرضوا المحتوى اللى يشد الناس بغض النظر عن إن الأخبار أو المعلومات دى صح ولا غلط  كلاب تفاعل هما 

- كنتيجة لكدة بتبدأ الإشاعات و الخرافات و المعلومات الغلط تنتشر زي السكينة فى الحلاوة  زي مثلا خبر موت عادل إمام اللى انتشر من فترة بسبب إن الجماعة بتوع الزرايب اكتشفوا إنه بيجيب Traffic حلو.. بتموتوا الزعيم علشان الترافيك يا كَفَرَة؟ 

- - - - 

بص يا صديقى.. مفيش أي حاجة ممكن تعملها علشان تحارب انتشار مزارع المحتوى إلا إنك تتجاهلها تماما 

معنى التجاهل اللى بكلمك عنه دا إنك متفتحش لينكاتهم ولا تدوس على إعلاناتهم ولا تنشر الأخبار الزبالة بتاعتهم،  

كمان عاوزك لو بتنشر أي خبر أو معلومة تحط معاها المصدر بتاعها علشان متبقاش مزرعة 

انت تعرف إن محرك بحث جوجل عمل تحديثات فى الكام يوم اللى فاتوا علشان يحارب الجماعة بتوع مزارع المحتوى دول؟ 

الموضوع كبييير جداااا و اتمنى تكونو استفدتو