باى باس كوماند ببجى موبايل Command Pubg Bypass بدون باند دخول سيرفر الموبايل

ما هو الرام ؟ Random Access Memory شرح كامل عن كل شئ يخص الرام

بسم الله الرحمن الرحيم

كلامنا النهاردة بقى عن الرام.. هذا المصطلح الذى حيَّر الأطباء، و عجز عن وصفه العلماء 

أولا: يعنى إيه رام يسطا؟ 

- بص يا ريس.. الرام دا كلمة من كلمات الفرنجة، عبارة عن 3 حروف R.A.M، و اختصار لـ3 كلمات من كلمات الفرنجة برضو هما Random Access Memory أو ذاكرة الوصول العشوائي  تخيل كدة لو كان اللى اخترع الرام دا عربي كان سماه "ذوع" !!

 الرام دا عبارة عن إيه؟ 

- الرام يا سيدى عبارة عن ذاكرة زي أي ذاكرة.. بس مش زي أي ذاكرة
(و دا طباق يوضح المعنى خلى بالك زي أي ذاكرة ازاى؟ 

- زي أي ذاكرة احنا نعرفها (سواء فلاشة أو هارد أو كارت ميمورى) فى إن لها سعة محددة، و بتتقاس بالبايت و مضاعفاته (مش لازم اقولك يعنى كيلو بايت و ميجا بايت و كدة).

- و مش زي أي ذاكرة فى حاجات تانية بقى.. أهمها طبعا الشكل
(فى الصورة اللي مع الكلام ده شكلها فى الكمبيوتر.. لو مش عارف شكلها يعنى 

- غير الشكل بتختلف فى التركيب الداخلي؛ الرام مش مكون من قرص زي الهارد (الـHDD) مثلا،
 لكنه مكون من Micro chips (أو مجموعة من الرقائق متناهية الصغر) علشان يناسب الشكل و الوظيفة اللي هتقوم بيها. 

- غير الشكل و التركيب مختلفة فى كيفية العمل أصلا، بعيدا عن الكلام الكتير.. الرام مش زي الهارد اللي بيحتفظ بالبيانات
لفترة طويلة حتى لو فصلت التيار عنه، بل على العكس.. الرام بمجرد ما تفصل عنه الكهربا بيفقد كل البيانات اللي متخزنة عليه، و لما توصل الكهربا تانى بيرجع يحط الداتا على الرام من أول و جديد

- علشان العملية دى تتم بيكون الرام مخصص للعملية دي، بمعنى إن سرعات الكتابة و القراءة من الرام بتكون كبيرة جدا
 لو قارنتها بحاجة زي الهارد مثلا أو الفلاشة، كمان إمكانية مسح البيانات بتكون سريعة جدا علشان تزود
 الفاضى من الرام باستمرار. 

-

اللي فوق دا كلام قديم و مفيش فيه جديد بالنسبة لناس كتير، فى الإنجاز كدة.. الرام دا بيهبب إيه فى الكمبيوتر أو الموبايل؟ 

- صليت بينا على النبي؟  لما بتروح تفتح الكمبيوتر أو تشغل الموبايل أول حاجة بيدور عليها فى الهاردوير هى الرام،
 بيقولك الجهاز فيه رام؟ على خيرة الله  نبدأ التشغيل 

- يبدأ التشغيل دى معناها انه يحمل نظام التشغيل (أيا كان) من الذاكرة الدائمة (سواء هارد أو فلاشة أو خلافه) على الرام،
و لما يخلص تحميل النظام بالكامل على الرام يبدأ يسمح لك بالتعامل مع النظام و هو على الرام. 

- طيب فرضا انت راجل مفتري على جهازك و عاوز - لا سمح الله- تشغل جوجل كروم؟ 

هيقوم الجهاز يعمل زي ما عمل فى نظام التشغيل و انت بتبدأ التشغيل.. ينقل جوجل كروم من الذاكرة الدائمة للرام
علشان يسمح لك بالتعامل معاه (عارف ليه جوجل كروم بيموت الجهاز؟)

- طيب على فرض انك عملت  شير للبوست دا وخلصت مع جوجل كروم و حبيت تقفله؟ الجهاز هيفتش العهدة اللي سلمها للرام (برنامج جوجل كروم)، و يشوف أي تعديلات أو تغييرات انت عملتها على البرنامج و يحفظها على الهارد
(اللي هو الذاكرة الدائمة طبعا) و يشيل البرنامج من الرام كأن لم يكن (الموضوع مش بالمثالية دى.. جوجل كروم بيكون ليه امتداد بيفضل شغال فى الخلفية علشان ياخد مساحة من الرام و يبطأ الجهاز على حق ربنا) 

-

- طيب لو حبيت اوضح الموضوع بصورة أبسط.. لو انت من اللي درسوا علم نفس فى ثانوية عامة و اتعورت فى درجتين
و نص زيى هتلاقى إنك درست أنواع ذاكرة البنى آدمين، و هتلاقى ذاكرة المدى الطويل (اللي هى الهارد)
 و ذاكرة المدى القصير (اللي هى الرام) و اللي كانوا بيوصفوها على إنها "منضدة عمل" 

لو مدرستش علم نفس اعتبرنى ولا كأنى قلت حاجة

-

- كتاب الكمبيوتر بتاعنا فى ابتدائي تقريبا كان اللى كاتبه ضارب بانجو أو حاجة و كان بيقول على الـRam
 إنها "الذاكرة المؤقتة" و هذا بهتان و إثم عظيم 

- الذاكرة المؤقتة دى هى الـCache memory، و اللى بتكون جزء من المعالج نفسه،
و سرعة الكتابة و القراءة عليه متتقارنش بالهارد ولا الرام ولا العك دا كله 

- سرعة الكتابة و القراءة و المسح على الكاش أكبر من الكلام التانى دا كله؛ لكن دا بيكون على حساب
 سعة التخزين اللى مبتعديش كام ميجا بس

- البروسيسور بيتعامل مع الكاش بس فى استلام البيانات، لو البيانات مش موجودة فى الكاش بيقوله اتصرف 

- يقوم الكاش يروح للرام (اللى أبطأ منه و سعته أكبر) و يسأله عن البيانات دى إذا كانت عنده أو لأ

لو عنده يبقى كان بها، معندوش بيبدأ يشوفها عند الهارد (اللى برضو أبطأ من الرام و مساحته أكبر)

و بالتالى الموضوع ممكن ياخد بعض الوقت لو إن الكاش صغير جدا أو إن الرام أصغر من المطلوب 

-

خلينى برضو أوضح لك الفرق بين الرام و الـSwap memory

- الرام زي ما قلتلك عبارة عن قطعة من الهاردوير لها مهمة معينة بتعملها

- أما الـSwap memory بتكون جزء من الذاكرة الدائمة (الهارد أو الميمورى) بياخدها السيستم علشان يشغلها زي الرام 

- طبعا من الكلام اللي فوق هتلاحظ إن الرام أكفأ من الـSwap memory بكتير .. أحييك على استنتاجاتك  

طيب لما الـSwap memory مش بكفاءة الرام، لزمته إيه؟

- لنفترض انك مشغل حاجات كتير مستغلة مساحة الرام كلها، و حاولت تشغل حاجة تانية عاوزة مساحة من الرام.. الجهاز قدامه حل من اتنين.. إما إنه يقولك ان الرام مش فاضى و حاول تقفل حاجة من البلاوى اللي انت فاتحها ، و إما إنه ينقل حاجة تكون انت راكنها من زمان شغالة للـSwap memory و يفضى جزء من الرام للبرنامج الجديد (و غالبا دا اللي بيحصل)،
لذلك ممكن تكون فاتح حاجة من الصبح على الكمبيوتر و عاملها minimize تيجى تروحلها
تلاقى الاستجابة بطيئة شوية فى الأول 

(عارف اللى بيقولك ممكن تزود رام لموبايل بالميمورى؟ دا مجرد إنه بيعمل Swap Memory لا أكثر ولا أقل)

---

- غير كدة المعتقد السائد إنك لو ضاعفت مساحة الرام هتضاعف السرعة أو هتضاعف الأداء دا اعتقاد خاطئ فى الغالب، ليه؟ 

لأن كل برنامج أو عملية بتعتمد على الرام ليها حجم معين بتاخده من مساحة الرام.

- على سبيل المثال لو انت عندك رام 16 جيجا، و برنامج زي الفوتوشوب بيستخدم 2 جيجا مثلا من الرام.. لو انت مش شغال على حاجة غيره هياخد 2 جيجا و يعيش حياته فيهم و يسيبلك الباقى تبيعه مباني 

على فرض بقى إنك زودت الرام و خليته 32 جيجا.. هل هتحس بفرق فى استخدام أو أداء الفوتوشوب؟ ولا الهوا 

أمال زيادة الرام هتفيدك فى إيه؟ 

- بعيدا عن إنها هتزود أداء الـGPUs المدمجة، فهى هتزود مساحة الرام المتاحة للاستخدام، و بالتالى هتديك إمكانية إنك تشغل حاجات أكتر فى نفس الوقت من غير ما تحتاج إنك تحط حاجة على الـSwap Memory
اللى لسة من شوية قايلك إنها بطيئة و بنت ستين كلب 

-

- بمناسبة الكلام عن سرعة الكتابة و القراءة.. ظهر من فترة كبيرة مصطلح DDR، و تلاقى اللي يقولك DDR3
و اللى يقول DDR4 و كدة

أولا: DDR دا اختصار لمصطلح Double Data Rate، و اللي معناه ان الرامات اللي بنستخدمها دلوقتى أسرع بكتير فى القراءة والكتابة من الرامات اللى كانت بتستخدم زمان، و دا بيفرق فى تردد الرام،
و اللي اختلفت الآراء حوالين إنه بيفرق فى الأداء أو لأ. 

ثانيا: لازم تكون عارف الرامات اللى فى جهازك نوعها إيه، و البوردة بتاعتك بتدعم رامات من أي نوع و البروسيسور بيدعم رامات نوعها DDR 2 ولا DDR 3 ولا DDR 4

و دا لأن الأنواع دى كلها مختلفة فى شكل السوكت و طريقة الشغل و استهلاك الطاقة و دعم البروسيسور 

اتمنى تكونو استفدتم <3