باى باس كوماند ببجى موبايل Command Pubg Bypass بدون باند دخول سيرفر الموبايل

بسم الله الرحمن الرحيم

زمان ومع بدايات ظهور الكمبيوتر وزيه زي اي تكنولوجيا جديدة بتظهر فيها مشاكل والشركات بتسعي
 لحل المشاكل دي وكان من أعوص المشاكل اللي واجهت الشركات كلها هو كتر الأسلاك اللي
بتوصل الكمبيوتر بالملحقات بتاعته (ماوس - كيبورد - طابعة - إسكانر.. إلخ)

فكان الجهاز الواحد بيبقي فيه من 8 إلي 25 سلك 

كان الواحد محتاج دكتوراه في الهندسة الإلكترونية علشام تعرف سلك اية دا وجاي منين ورايح فين
ومرتبه كام فَـ الشهر وعنده كام عيل وشغلانة 

من سنة 1980 كان فيه محاولات من شركات تقنية لحل مشكلة الأسلاك الكتيرة دي، لكنها كلها كانت بتبوء بالفشل 

فكروا في أستخدام تقنية ( InfRared ) اللي أسمها ( IR ) زي اللي كانت زمان في موبايلات نوكيا
 (وبعض أجهزة الأندرويد حتي زي الـS4) واللي بتستخدم في ريموت التلفزيون أصلًا..

المهم العين كانت عليها في إنها هي المنقذ وهي اللي هتحل مشكلة تعدد الأسلاك 

لكنها كان ليها مشكلتين أساسيتين..

-الأولي إنها كانت بتعمل الأتصال في مجال الرؤية بس " Line of sight "
يعني مباشرةً وعلي خط مستقيم.. تقولش بنلعب بلي 

-التانية إن ال IR تقنية واحد لواحد (One To One) علشان الجماعة بتوع الأنجليزي 

يعني من جهاز لجهاز بس.. يعني ترسل بيانات من كمبيوتر لموبايل.. لكن من كمبيوتر لموبايل،
 وفي نفس الوقت لكمبيوتر تاني لاء..

لذلك في شهر أغوليوص سنة 1993 أجتمع 30 شركة زي ( HP - IBM - NOKIA ) وطبعاً لازم أي جماعة يبقي
ليها أسم  فأطلقوا علي نفسهم أسم ( Infrared Data Associationn ) أختصروه ب ( irDA )
كان الغرض من التجمع ده أنهم يتفقوا علي ميثاق أو (بروتوكول) محدد علشان يتعاملوا بيه في أرسال
 وأستقبال البيانات، كان المفروض إن التقنية دي تتغلب علي مشكلة ضرورة الأتصال البصري بين الأجهزة
 بمعني تاني مشكلة "إن لازم الجهازين المُرسل والمُستقبل يكونوا في أتجاه بعض"

لذلك أستعانوا بشركة Ericsson علشان يتوصلوا لحاجه تمكنهم من عمل إتصال بين الأجهزة
لاسلكياً وتكون الأجهاز بعيدة عن بعض (ومش في اتجاه بعض)

المهم.. بعد كمية أبحاث وشوية ورق A4 أتكتب عليهم أفكار كتير (وفي الآخر أتقطعوا.. )

توصلت الشركات دي لبعض المواصفات اللي أتفقوا عليها، اللي قادتهم في الآخِر خالص إلي ما نعرفه اليوم
 بَـ أسم (Bluetooth) محدش بياكلها بالساهل 

المهم بعد كده غيروا اللقب بتاعهم لـ(مجموعة المهتمين بتقنية البلوتوث)
 أو (Bluetooth special interest group) رخم الأسم صح  لذلك أختصروه بَـ(BSIG)
 وتزايد عدد الشركات المُساهم: لغاية ما وصل لـ1000 شركة  وواصلوا أبحاثهم وطوروا جهاز الأيدز
 وفيروس سي وحلو مشاكل المجاعة والفقر وقفلوا الأوزون وكل حاجة 

-عمال من الصبح بتقول بلوتوث.. بلوتوث ومقولتلناش يعني إيه بلوتوث!!

=هقول لك متستعجلش 

كلمة (بلوتوث) بالعربي، أو (BlueTooth) بالأنجليزية بمعني (سن زرقاء) خدوها من إسم ملك
-والمُلك لله وحده- كان أسمه (Harald Bluetooth) اللي وحد الدنمارك والنرويج.. 

لية سموا التقنية بأسم حاكم ؟!

لأن الشركات المشاركة في أختراع البلوتوث من الدول الأسكندينافيه.. أريكسون من السويد، ونوكيا من فنلندا،
فهما بيعلنوا أحترامهم للحاكم دة بأنهم سموا البلوتوث بأسمه.. الدم بيحن بردو 

سؤال ممكن يدور ببالك .. ليه أتسمي هيرالد ب بلوتوث "صاحب الناب الأزرق" مش علشان هو كان شبح وكدة لاء  

بيقول لك أنه كان بيحب فاكهة معينة لونها كان أزرق فكانت بتخلي أسنانه زرقا بردو 

وبردو بيقولوا أنه مكانش شبه حد من عشيرته؛ فعلشان كده أتسمي بصاحب الناب الأزرق..

-البلوتوث بيتنطق ( بلو توث ) مش بلدوث زي التلوث اللي بنسمعه فَـ الشارع 

خليك فاكر لو نطقت أسمه غلط أبو ناب أزرق هيطلع لك 

مالنا أحنا بسنانه ولا لون شعره  نرجع لموضوعنا بقي..

اللِب خلص ؟! .. أنتا مجبتش أصلاً من الأول.. طيب أبعت هات علشان قدامنا شويتين كمان 

ليه البلوتوث ومش الـIR ؟!

-البوتوث لاسلكي.. يعني ممكن تتحكم في الكمبيوتر وأنتا نايم ع السرير  

- رخيص التكلفة

-قوي علي عكس ال IR

- بيستخدم طاقة منخفض

- بمجرد تشغيله بيحدد هوا هيتصل بأنهي (نمط) "ودي هنتكلم عنها تحت"
مع الجهاز التاني وبيعمل الأتصال من غير تدخل منك 

مقولناش أستخدامات البلوتوث..

البلوتوث أستخدامه مش مقتصر علي نقل الملفات بين جهاز والتاني..
لاء لأن البلوتوث مش مجرد سن زرقاء 

-بيستخدم في توصيل الملحقات زي "الماوس وكيبورد" بالكمبيوتر..

-بيستخدم في أجهزة الرعاية الصحية.. سواء في المستشفيات أو أجهزة الأستخدام الشخصي زي
السوارات الذكية وغيرها

-بيستخدم في توصيل الملحقات الصوتية.. زي سماعة البلوتوث الحزينة اللي عندي جوا دي 

-بيستخدم كمان في ربط الموبايل بالكمبيوتر؛ لنقل البيانات.. وتشغيل نت الكمبيوتر علي الموبايل
 وكذلك تشغيل نت الموبايل علي الكمبيوتر (Bluetooth Tethering)

-توصيل الكمبيوتر بكمبيوتر تاني لمشاركة البيانات

في حاجة أسمها أنماط البلوتوث.. ودي اللي بُناءًا عليها بيتحدد نوع الأتصال اللي بيتم بين الجهاز والتاني..

-نمط FTP : وده الأشهر علي الأطلاق اللي من خلاله بتستعرض الملفات الموجودة علي جهاز آخر وتبادل الملفات
 من وإلي أي جهاز (اللي كنا بنستخدمه ايام الـN70 )

-نمط HSP : وده المسئول عن ربط سماعة البلوتوث بالهاتف، وبيسمح بَـ إرسال وإستقبال الصوت في وقت واحد

-نمط BIP : وده نمط التحكم الأساسي في الصور.. زي إرسال الصور.. أو أرسال وطباعة الصور

-نمط BPP : وده النمط الأساسي في التحكم بالطابعات.. منه بتدي أوامر مباشرة للطابعة،
حتي من غير تعريف الموبايل علي الطابعة.

-نمط DUN : وده المخصص لربط الموبايل بالكمبيوتر، ثم تشغيل النت علي الكمبيوتر عن طريق الموبايل..
 (الـBluetooth Tethering برضو! )

-نمط FAX : وده واضح معناه  ده المُصمم علشان يستخدم الموبايل "الداعم للفاكس" كَـ فاكس

-نمط PBPA : وده يعتبر نمط دفع ومشاركة جهات الأتصال.. عارف الأختيار اللي موجود
 في الـDailer اللي هو "مشاركة جهات الأتصال" دة النمط المسئول عنه..

-نمط الكاميرا وده اللي بيسمح بتشغيل الكاميرا علي الكمبيوتر

دي مش كل أنماط أتصال البلوتوث، لكنها أكثرهم أستخداماً وشيوعاً.. (حلوة شيوعاً دي )

اصدارات البلو توث

بس مش هنذكرهم كلهم وهنكتفي بمقارنة بين آخِر إصدارين وهما الـ4 (سواء 4.1 او 4.22 مش بتفرق) والـ5.0

الـS8 هو أول جهاز ينزل بَـBluetooth 5.0 

انتَ كَـ مستخدم عادي تعرف انك عندك بلوتوث علي جهازك.. مبيفرقش 4.0 او 4.1 او حتي 4.22
هو بالنسبالك بلوتوث وخلاص بسبب ان الفرق مابينهم مش كبير إطلاقاً..

ولكن.. الـ5.0 كان قفزة عملاقة والفروق الأساسية كانت كَـ الآتي :

-التوصيل اسرع بمرتين : سرعة توصيل جهازك بجهاز آخر بيدعم البلوتوث اذا كانت بتاخد
 (علي سبيل المثال) 10 ثواني مثلاً فَـ هتحتاج نص الوقت بس يعني حوالي 5 ثواني بس 

-المدي زاد 4 أضعاف : النقطة دي كانت من أهم عيوب البلوتوث بحيث أنه في المتوسط شغال في مساحة 10 متر
 ولكن في ظروفة القياسية كان بيوصل لـ50 متر..

-لكن في الإصدار 5.0 وصل لـ40 متر Indoor وحوالي 2000 متر في الظروف القياسية ودي قفزة عملاقة 

-8 أضعاف البيانات اللي تقدر تنقلها : يعني اعتبر انك عندك طريق طوله 10 كيلو وحارة واحدة وبتمشي عليه بسرعة 10 كيلو متر في الساعة وطريق تاني 8 حارات مثلا وطوله 80 كيلو وبتمشي انت بسرعة 80 كيلو في الساعة
وهتوصل لاخره خلال ساعة..

الموضوع دا حل مشكلة ان الصوت يبقي متأخر ورا الفيديو (مش بشكل كلي ولكن شبه قضي عليها )

وبردو مما سمح بخاصية جديدة سامسونج أطلقت عليها Dual Audio وهي خاصية بتسمحلك
 انك توصل سماعتين بلوتوث في نفس الوقت علي نفس الجهاز