باى باس كوماند ببجى موبايل Command Pubg Bypass بدون باند دخول سيرفر الموبايل

Bloatware و Junkware تطبيقات ملهاش لازمة
و سبب رئيسى فى تدمير جهازك

بسم الله الرحمن الرحيم

فيه حاجه أسمها (تأثير لوبي) ودي بتوصف الناس اللي مفيش بينهم وبين الألكترونيات عمار اللي لمّا يقرَب من التلفزيون يبوظ ، أو ييجي ناحية الراديو -اللي كان شغال عادي- تلاقي الراديو بيقطّع ويوِش.. هُمَّا مبيلعبوش في الأجهزة دي ولا حاجة!
لكن مجرد وجودهم بس كافي لأن الأجهزة تبوظ  بيقولوا أن أجسامهم بتـ ...المهم .. ده مش موضوعنا النهارده ..
النهارده هنتكلم عن الـ Bloatware والـ Crapware .. مين هُمَّا ؟ وإيه أعراضهُم ؟ وبيسببوا إيه ؟ 

من غير تعقيدات فـ أي برنامج أتثبت علي جهازك من غير موافقتك لأي سبب -زي مكافي
 أنتي فيروس McAfee Antivirus - ولقيته علي جهازك وخلاص .. أي شريط أدوات
للمتصفح (Browser Toolbar) زي Hao123 وأتباعُه اللي بيغيَروا صفحة المتصفح الرئيسية ويقرفوا الواحد  ..
 أي برنامج بيشتغل من تلقاء نفسه أول ما تشغَل الجهاز.. كل الحاجات دي بتتسمي Bloatware و Crapware ..
 البرامج اللي أتثبتت من غير أختيار معاليك يعني ومن غير عِلمَك كمان ..

* لكن فيه فرق بين الأتنين :

- الـ Crapware : بتُطلَق علي البرامج اللي تعتبر ملهاش أي ستين لازمة ومبتستخدمهاش .. زي شريط أدوات المتصفح  اللي بيبقي واكل لوحده نُص الشاشة وعمّال يعرض لك في مواقع أنتا عمرك ما هتستخدمها ومبيبقاش فيه أي مساحة
 ليك علشان تشوف المحتوي اللي أنتا فاتح المتصفح علشان تشوفه وبيملأ لك الدنيا إعلانات وبلا أزرق .

- الـ Bloatware : ودي بقي بتُطلق علي البرامج اللي بيبقي ليها لازمة أو ممكن تستخدمها .. برامج -زي
مكافي أنتي فيروس مثلاً بتستخدمها وتستفاد منها لكنها أتثبتت بدون إرادتك زي اللي بتكون جايه مع الكمبيوتر
 والموبايل مثلاً واللي لو أُتيحَت ليك الفرصة مكنتش هتوافق علي تثبيتها من أساسُه 

البرامج دي بتبقي مستخبية كده وبتنتهك حرمة راماتك اللي علي قدها وبروسيسورك اللي بالعافية بيشغَل الميديا بلاير 

من الآخر الكراب والبلوت وير الأتنين أسوء من بعض وبيساهموا في أنهم يخَلوا جهازك أبطأ ..
و"ما أسوء من زيد إلا عبيد" زي ما بيقولوا 

--

* مين بقي بيجيب البرامج دي أو بيفتح لها الباب تدخل الجهاز ؟ 

شركة زي Avast بتدفع للشركات اللي بتصنّع الأجهزة علشان يحطوا البرنامج بتاعهم علي الأجهزة .. وعندك أغلب الناس ميعرفوش إزاي يتخلصوا من البرنامج .. وناس غيرهم مش عارفين أنهم ممكن يشيلوه من الأساس .. أو حتي أنهم ممكن
 لو دوَروا علي النت هيلاقوا بدائل مجانية زي البرنامج اللي هوا مجاني في الأساس  وممكن تكون
 أحسن من اللي متثبَت عندهم بمراحل 

--

* إزاي تشيل الـ Bloatware ــااات دي وتنضّف جهازك ؟ 

1- أنك تمسح البرامج يدوياً وأنتا أعزَل من السلاح :

ودي بالـ Uninstaller المدمج في الجهاز نفسه .. ودي عن طريق إنك تدخل في المسار ده :
Control Panel\Programs\Programs and Features وتختار البرنامج اللي شاكك فيه
وعاوز تحذفه وتشيلُه .. أسهل من الإسهال يعني 

لكنه حل مش كويس أوي ؛ لأن معظم البرامج دي بعد ما بيمشوا بيكونوا سابوا لك شوية ملفات
 في الريجستري كده علشان يطلَعوا عينيك 

--

2- أنك تمسح البرامج ببرنامج وتحاربهم العين بالعين :

- عن طريق برنامج Revo Uninstaller :

حمَل البرنامج من هنا من الموقع الرسمى Revo Uninstaller

وبعد ما تثبتُه ، شغَلُه وأستني لغاية ما يطلّع لك قائمة بالبرامج اللي علي الكمبيوتر بتاعك ، أختار البرنامج اللي
عاوز تشيله وأضغط علي Uninstall والبرنامج هيحذف لك البرنامج اللي أنتا حددتُه وينضَف المُخلفات بتاعتُه
 وأبقي خد بالك أحسن تمسح برنامج تكون محتاجه ، قبل ما تمسح أي برنامج أبحث عنه وأعرف
 هوا بيعمل إيه قبل ما تقرر هتمسحه ولا لاء ..

--

3- أستخدم تاني كارت وحاربهم بالتنين المُجنّح Decrap :

* إنك تشيل البرامج برنامج زي برنامج Revo دي حاجه مُمِلَة أكتر من أنك تتفرّج علي الخليل كوميدي
 لذلك برنامج Derap بيوفر عليك ده كلُه وبيعمل Scan فحص لجهازك وبيطلّع لك قائمة بالبرامج المُتهمة
والمشكوك في أمر كونها من الـ Bloatware وبعدين تقدر أنتا تتخلَص منهم كلهم مرة واحدة 

- حَمِل برنامج Decrap من الموقع الرسمى : De Crap

- شغّل البرنامج وسيبُه يعمل شوية الحبشتكنات بتوعُه ، هيسألك لو عاوز تخليه يشتغل تلقائي فـ سيب الأختيار
 ده من غير ما تدوس عليه .. بعد كده هيعمل Scan للجهاز ..

- بعد ما يجيب لك قائمة فيها البرامج ، أختار البرامج اللي عاوز تشيلها واللي هتلاقيها في تبويب
 "Automatically Starting Software " و " Third Party Software " وسيب التعريفات
 " Drivers " و برامج الويندوز" Windows Related Software " ..

- أضغط Next وأختار أنك تعمل نقطة أسترجاع للويندوزSystem Restore Point لمّا يطلب منك ..

- سيب البرنامج لغاية ما يشيل البرامج كلها ، وبعد ما يخلّص هيكون بقي عندك كمبيوتر أنضف بكتير من الأول ..

* وقبل ما تمسح أي برنامج أتأكد من Google مثلاً إنه برنامج ملوش لازمة وأنك مش هتمسح حاجه ممكن تشتغل بيها ؛
لأن التطبيقات مُسبَقة التثبيت ساعات بقول ساعات بتكون كويسة وممكن تستفيد منها وكده 

--

4- سطّب ويندوز جديد ويبقي علي الويندوز القديم السلانكاتيه :

معظم الناس ممكن تفضَل إنها متعملش أي حاجه من دول وتغيّر الويندوز بحالُه! بس في الحالة دي هتكون محتاج
أسطوانة ويندوز أصلية من مايكروسوف يكون مفيش عليها أي Bloatware بدل الويندوز الخربان بتاعتك
 ويكون معاك مفتاح التفعيل license key وثبت الويندوز الأصلي وأتمتَع بكمبيوتر خالي من المشاكل 

--

* إزاي تخلَص من الـ Toolbars اللي بتيجي ع المتصفح ؟

أوقات لمّا بتثبَت برنامج بتلاقي برنامج تاني أتثبت عندك زي شريط أدوات بييجي في المتصفح ، وتلاقي الصفحة الرئيسية للمتصفح بقت Yahoo.com ولا Hao123 والقرف ده كله  عارفها ؟ اللي بتبقي مليانة إعلانات
دي وبيعملوا من وراك أحلي سَبوبة! 

- عليك وعلي برنامج ( AdwCleaner ) :

- حمل البرنامج من الموقع الرسمى : AdwCleaner

- أفتحه وبعدين أضغط Scan وبعد ما يخلّص من فحص الجهاز أتوجة لتبويبات ( Services و Folders و Files ) وأفحص أي حاجة فيها عاوز تشيلها لأن البرنامج ممكن ميكونش دقيق أوي وميختارش كل حاجه وكده ..
 ولو فيه برنامج محتار ومش عارف تشيله ولا لاء ابقي أدخل ع الصفحة دي : Should i Remove it
 وأعرف إيه وظيفة البرنامج الأول وهل من الخطر إنك تشيله ولا لاء ..

- بعد ما تتاكد إنك خلاص أخترت كل اللي عاوز تمسحه ، إضغط Clean ، بعدها البرنامج هيمسح
 اللي أخترته ويعمل إعادة تشغيل للجهاز-Restart ويديك تقرير بالحاجات اللي مسحها 

--

* إزاي بقي تتجنَب البرامج اللي ملهاش لازمة دي مستقبلاً ؟

المفروض إنك بقي عندك جهاز نضيف خالص من كل حاجة فـ تحاول تحافظ عليه بقدر الإمكان ..

فـ دول شوية نصايح علشان لمّا تحمَل برنامج متلبسش في برنامجين قرايبُه ملهمش لازمة :

- متحملش البرنامج غير من الموقع الرسمي بتاعُه :

في موقع تحميلات زي Download.com بيعملوا ملف تسطيب خاص بيهم ويرموا لك فيه الـ crapware
 وأنتا زي الشاطر تلبِسُه 

فـ حاول بقدر الإمكان متحملش أي برنامج غير من الموقع الرسمي بتاعه علشان محدش يغفلك 

- الـ crapware ممكن ميبقاش في ملف الـ exe نفسه :

ساعات الـ crapware بيكون في صفحة تحميل البرنامج مش في الـ exe .. كمثال عندك Adobe بتسمح لك إنك
ممكن تلغي تحميل McAfee من صفحة التحميل نفسها .. ممكن برامج تانية لشركات تانية تعرض لك الـ crapware
مع النسخة الكاملة من البرنامج مثلاً ، لكنها مبتبقاش موجودة مع النسخة المحمولةPortable ..
شركات غدَارة أوي فـ خُد بالك 

- بلاش تدوس أوافق Agree علي طول :

لأن ممكن يبقي من ضمن شروط الخدمة terms of service إنك بتوافق علي الـ Crapware وأنتا متاخدش بالك
 وتدوس علي Agree علي طول .. عقلك بيستسهل وعاوزك تدوس علي Agree علشان ميتعبش ويقرأ ،
 لكن خد بالك ومتدوسش موافق غير لما تلاقي إن شروط الخدمة مناسبة للتطبيق نفسه ، ولو مش مناسبة ..
عادي جداً دوس Decline وِش 

- متفضلش تدوس Next بعد Next من غير ما تقرأ :

لو مكنتش واخد بالك إنتا بتثبت إيه فـ أنتا ممكن تثبت Crapware وأنتا مش واخد بالك! أقرأ كل الخيارات
 الموجودة في واجهة تثبيت أي برنامج ومتطنشهاش وتعمل Next في Skip 

-دايماً أختار التثبيت المُخصَص-Custom Install :

وأنتا بتثبت أي برنامج أختار Custom Install وشوف إنتا بتحدد أنهي خيارات لأن ده بيخليك تتفادي الوقوع في Crapware وأنتا مش واخد بالك ..

- أقرأ كل مربع أختيار-checkbox :

أقرأ كل مربع بعناية لأنهم ممكن يخفوا الـ crapware في أي مربع أختيار في أي صفحة من واجهة التثبيت وأنتا متاخدش
 بالك منه ، فـ أقرأ مربعات الأختيار بالراحة وألغي أختيارك عن أي حاجه مش عاوزها تتثبت .. محدش بيجبرك علي حاجه! 

- خد بالك من العروض المتكررة :

مش معني إنك فلَتت من الـ Crapware في أول شاشة من واجهة التسطيب مثلاً إنك خلاص كده شبح بقي وعلوضعك!
 لاء يا حبيبي!  أنتا ممكن تقابل عروض كتيرة لتثبيت نفس شريط الأدوات Toolbar في نفس واجهة التثبيت فـ خًد بالك 

-----------------------------------------

علي الجانب التاني بقي و Hello from the other side وهنتكلم عن الـ Bloatware والموبايلات وكده

الشركات المُصنعة للموبايلات بتحاول أنها توفر للمستخدم أحسن واجهة تسهل للمستخدم تعاملُه مع الجهاز ..
 وفيه شركات زي العظيمة جوجل بتحقق للمستخدم أفضل أستخدام لواجهتها عن طريق أنها متحطش أي تطبيقات
 زائدة وبتكتفي يدوب بالتطبيقات الأساسية .. علي العكس تماماً .. شركة زي سامسونج .. واخده الدنيا من ورا
 بتحشي الموبايل بتطبيقات وإضافات المستخدم ممكن ميستخدمهاش هوا حرفياً مش هيستخدمها
 عمرك سمعت عن حد أستخدم المرحوم Chat On ؟ 

* لمّا سامسونج عملت الـ Galaxy S4 المستخدمين أشتكوا من إن الموبايل بطئ وكده ، ورجعوا السبب إلي أنه كان بسبب التطبيقات الإضافية اللي علي الجهاز .. الموبايل مساحته الداخلية 16 جيجا منهم 7 جيجا كاملين للنظام بالتطبيقات
 اللي الأخت سامسونج كانت حطاهم 

التطبيقات دي بتستخدم موارد الجهاز وبتساعد في إنه يبقي أبطأ وأقل كفاءةً .. وبتشغل مساحة تخزينية كبيرة ..
بالإضافة لأنها بتستنزف البطارية عن طريق أنها بتكون شغّالة في الخلفية من غير ما تاخد بالك .
. لا تترك الأخضر أو اليابس يعني 

--

* إزاي تشيل الـ Bloatware دي بقي وتريح بالك وجوالك منهم ؟ 

إنك تعمل خطوة زي دي فأنتا محتاج يكون عندك خلفية بالبرامج اللي بتتعامل معاها ، وتاخد بالك علشان
متوقَفش خدمة من خدمات النظام ولا حاجة ..

أنتا قدامك طريقتين :

1- تعمل تعطيل للتطبيق يدوياً :

ودي سهل جداً تعملها ومبتبقاش عاوزة أي صلاحيات ..

أفتح الإعدادات-Settings ، وبعدين التطبيقات-Apps ، وبعدين أسحب من الشمال لليمين علشان توصل لتبويب
 الكل All ، وبعدين تختار تطبيق معين عاوز توقَفُه وتفتح المعلومات بتاعته وتدوس تعطيل Disable ..
 هتظهر لك رسالة تحذيرية علشان ما أنتا هتعطَل التطبيق وكده ، دوس موافق Ok علي طول 

التطبيق اللي بتعمل له تعطيل بيختفي من قائمة التطبيقات App Drawer ..

وخد بالك إن مش كل التطبيقات هتوفر لك أختيار إنك تعطلها ..

ولو منفعتش معاك الطريقة الأولي دي يبقي جرّب الطريقة التانية ..

 الطريقة التانية 

2- تشيل التطبيق من أساسُه لو واخد صلاحيات الرووت :

لو كان التطبيق مش متاح إنك تعمل له Disable ، أو نسخة الأندرويد بتاعة جهازك قديمة ومفيهاش أختيار إنك تعطَل التطبيقات فمش هيبقي قدامك غير إنك تشيل التطبيق من أساسه 

حمل تطبيق System app remover من هنا : systemapp

بعد ما تثبتُه ، أفتح التطبيق هيطلب منك ياخد صلاحيات الرووت .. أديهالُه ، وبعدين هيفتح لك قائمة التطبيقات
 وهتلاقي تطبيقات كتيرة والتطبيق اللي تلاقي تحته "Could remove" يبقي تعلم عليه لو مكنتش بتستخدمه
 وبعدين تدوس علي Uninstall

وبكده اكون انتهيت من شرح موضوع انهاردا يارب يعجبكم :)